Канфіскавалі. Што далей?

Рэчы, якія перайшлі ў маёмасць дзяржавы на тэрыторыі нашага раёна, у далейшым рэалізуюцца праз спецыяльныя аддзелы ў магазінах ААТ “Гандаль”.

Па інфармацыі сектара па кіраванні дзяржмаёмасцю, прыватызацыі і прадпрымальніцтву райвыканкама, у пераважнай большасці выпадкаў гэтыя аддзелы папаўняюцца адзеннем і абуткам, якія не маюць прадугледжаных правіламі гандлю дакументаў. У пераважнай колькасці выпадкаў гэта “шэры” імпарт, які прывозяць індывідуальныя прадпрымальнікі. Кантрабандная касметыка сустракаецца радзей, а з найбольш незвычайных пазіцый можна назваць петарды і рыбацкі рыштунак.

Спектр прадметаў, якія канфіскуюцца судом за маёмасныя альбо крымінальныя злачынствы, вельмі шырокі, аднак дамінуюць у ім мабільныя тэлефоны.

У некаторых выпадках канфіскаваная маёмасць у адкрыты гандаль не трапляе. Так, наркатычныя рэчывы знішчаюцца, а адабранае ў “салярачнікаў” дызпаліва прадаецца прадпрыемствам раёна.

Зараз рыхтуюцца дакументы на рэалізацыю 12 аўтамабіляў, канфіскаваных за разнастайныя парушэнні закону. Прадавацца яны будуць праз аўкцыён, які пройдзе ў Магілёве.

Грошы, атрыманыя за продаж канфіскату, ідуць у рэспубліканскі бюджэт. Адзінае выключэнне — безгаспадарчая маёмасць, даход ад продажу якой застаецца ў распараджэнні раённай адміністрацыі. Як правіла, да ўзгаданай катэгорыі адносяцца кінутыя злачынцамі прадметы, чыіх гаспадароў не ўдалося ўстанавіць.