Значэнне бібліятэк у жыцці грамадства, яго культуры цяжка пераацаніць. Чалавек пачынае знаёміцца са шматгранным кніжным светам з першых гадоў жыцця. Яшчэ з дзяцінства мы ведаем, што бібліятэка — гэта дом кнігі. Менавіта дом, таму што ў ім сабрана вялікае  мноства рознай літаратуры, гэта месца, дзе чытач можа акунуцца ў свет фантастыкі ці дэтэктываў, прыроды ці гісторыі. Казачныя героі і падарожжы пераносяць юных чытачоў у свет мрой, дзе падзеі вучаць агульначалавечым каштоўнасцям…

З даўніх часоў кнігі мелі вялікае значэнне для чалавека. Калі не было магчымасці чытаць, людзі з задавальненнем слухалі розныя гісторыі, а потым з цягам часу спачатку ад рукі, пасля на друкарскіх машынках пісалі гэтыя гісторыі. Сёння вельмі развіты лічбавы свет, але ўсё роўна нішто не заменіць папяровую кнігу! Тоўстую ці тонкую, новенькую, з пахам друкарскай фарбы ці старую, з крохкім пераплётам… Гэтая вялікая папяровая вынаходка дапамагае захоўваць, назапашваць і перадаваць вопыт, мудрасць і веды з пакалення ў пакаленне. А вось заслуга ў тым, што многія кнігі і рукапісы дайшлі да нашых дзён, належыць бібліятэкам і іх цудоўным работнікам.

Цэнтралізаваная бібліятэчная сетка раёна — гэта 26 бібліятэк: раённая, гарадскія №№ 1 і 2, Савецкая, Ялізаўская, Татаркаўская і 20 сельскіх. Пра іх работу і даведаліся больш падрабязна ў загадчыка аддзела маркетынгу і сацыякультурнай дзейнасці раённай бібліятэкі Зоі Пышнай:

— Наша бібліятэчная сетка мае ўніверсальны кніжны фонд, які налічвае больш за 328 тысяч экзэмпляраў рознажанравай літаратуры. Дарэчы, толькі за апошнія восем месяцаў паступіла 1 547 кніг. Сёння нашымі паслугамі ў раёне карыстаюцца 17,4 тысячы чытачоў. Кнігавыдача складае больш за 290 тысяч асобнікаў літаратуры. Усе бібліятэкі   камп’ютарызаваны, маюць выхад у інтэрнет і электронную пошту. Арганізавана 29 працоўных месцаў для карыстальнікаў.

Пры бібліятэках дзейнічае 19 публічных цэнтраў прававой інфармацыі, 33 клубы па інтарэсах для розных катэгорый карыстальнікаў. Афіцыйны сайт установы задавальняе запыты чытачоў і адлюстроўвае ўвесь спектр дзейнасці бібліятэк сеткі.

Абслугоўваюць чытачоў 55 бібліятэчных спецыялістаў, праца якіх вельмі шматгранная: мы працуем са старшакласнікамі і бацькамі, педагогамі, проста аматарамі добрай кнігі. Бібліятэкары павінны выдатна разбірацца ў кніжных навінках, якія да нас паступаюць, умець падабраць чытачу літаратуру па інтарэсах. Да таго ж рэгулярна праводзім творчыя мерапрыемствы, літаратурныя сустрэчы, пасяджэнні клубаў.

Сектарам па абслугоўванні дзіцячага чытача гарадской бібліятэкі № 1 у рамках Года гістарычнай памяці распрацаваны і рэалізуецца інфармацыйна-адукацыйны праект грамадзянска-патрыятычнага выхавання дзяцей і падлеткаў “Ідзём шляхам памяці”. У гэтым праекце актыўна ўдзельнічаюць воінская часць 12180, ваенна-гістарычны клуб “Штык”, раённая арганізацыя грамадскага аб’яднання “Беларускі саюз ветэранаў вайны ў Афганістане”.

Летам бібліятэкі вялі працу па рэалізацыі праекта летняга чытання “Лета ў рэжыме 3D: Двор. Дзеці. Вольны час”. Усяго падрыхтавана 216 мерапрыемстваў, іх удзельнікамі сталі 1 667 дзяцей і падлеткаў.

Дараганаўская сельская бібліятэка прыняла ўдзел у рэспубліканскім конкурсе “Бібліятэка — асяродак нацыянальнай культуры” і ўзнагароджана Дыпломам   III ступені за рэалізацыю пошукава-даследчага праекта “Сям’я Дараган у гісторыі Асіповіцкага краю”.

Дарэчы, работнікі бібліятэк рэгулярна праводзяць цікавыя мерапрыемствы і ўдзельнічаюць у розных конкурсах і выставах, папулярызуючы кнігу сярод людзей рознага ўзросту.