Па інфармацыі Асіповіцкага філіяла “Бабруйскводаканал”, фінансаванне вядзецца праз інвестыцыйную праграму Магілёўскай вобласці і разлічана на два гады. Сёлета плануецца завяршыць першую будаўнічую чаргу — стварыць комплекс неабходных збудаванняў непасрэдна на водазаборы “Паўночны”. Гэта дазволіць забяспечыць пітной вадой нарматыўнай якасці каля 90 працэнтаў гарад-скога насельніцтва. Другая будаўнічая чарга (2023 год) уключае ў сябе закальцоўку сеткі гарадскога водаправода, рэканструкцыю ўсіх свідравін водазабора “Паўночны” і шэраг іншых работ.

З гэтай нагоды трэба адзначыць, што будуемы зараз магістральны вадавод ад водазабора “Паўднёвы” да мікрараёна вуліцы Чарняхоўскага аўтаматычна мяняе сваё прызначэнне. Калі першапачаткова ён меў прыярытэт як інструмент для паніжэння канцэнтрацыі жалеза ў пітной вадзе на паўночным баку горада, то зараз яго галоўная роля — павышэнне надзейнасці сістэмы водазабеспячэння. Доўгі час паўночная і паўднёвая часткі асіповіцкага водаправода злучаліся толькі адной “трубой”, і яе выхад са строю мог прывесці да вялікіх непрыемнасцей. Стварэнне яшчэ аднаго “аб’яднаючага пункта” гэтую пагрозу здымае цалкам.

Нагадаем, што першапачаткова праблему якасці пітной вады на паўночнай частцы Асіповічаў планавалася вырашыць з дапамогай Еўрапейскага банка рэканструкцыі і развіцця, аднак у 2020 годзе супрацоўніцтва было спынена па ініцыятыве гэтай фінансавай установы. Пошук альтэрнатыўных крыніц фінансавання патрабаваў часу, аднак атрымалася сімвалічна: адна з важных праблем горада можа быць вырашана да яго 150-годдзя.