З 1994 года ў першую нядзелю верасня ў гістарычных і культурных цэнтрах Беларусі, з якімі непарыўна звязана жыццё і дзейнасць знакамітых асоб,  адзначаецца Дзень беларускага пісьменства. Бібліятэкі, як  цэнтры кніжнай культуры, прапануюць чытачам пазнаёміцца з гісторыяй узнікнення гэтага дня, з навінкамі літаратуры, новымі літаратурнымі імёнамі, даведацца аб развіцці кнігадрукавання ў нашай краіне.

Менавіта гісторыі беларускага кнігадрукавання і яе лепшым прадстаўнікам будуць прысвечаны мерапрыемствы бібліятэк, якія адбудуцца ў межах Дня асветніцтва “Як прыйшла да нас кніга”. Ва ўсіх бібліятэках Асіповіцкага раёна можна пазнаёміцца з літаратурай аб жыцці і дзейнасці асветнікаў, з навінкамі беларускіх выдавецтваў. Бібліятэкі запрашаюць сваіх чытачоў прыняць  удзел у гістарычных падарожжах і экскурсах “Летапіс беларускага слова”, “Да вытокаў кніжнасці”, уроках гісторыі   “Асветнікі зямлі беларускай”, “Не знікне цуд прыгожага пісьменства”, пазнавальных га-дзінах “Як слова наша нарадзілася”, “Вытокі беларускага кнігадрукавання”, прэзентацыях “Чалавек прыдумаў кнігу”, “Францыск Скарына — асветнік, першадрукар” і іншых.

Гэтым святам бібліятэкі яшчэ раз хочуць напомніць, што кніга — радасць для кожнага чалавека. Той, хто яе чытае, становіцца разумным і мудрым, жыццё яго робіцца больш цікавым і  змястоўным. Давайце ж часцей будзем чытаць кнігі. Іх зараз так многа — самых разнастайных, на любы густ.

Цэнтралізаваная бібліятэчная сетка Асіповіцкага раёна.