Духмяны водар булак

Вялікдзень прыносіць у кожны дом радасць. Адзін з яе складнікаў — прыгатаванне святочнай стравы, у тым ліку кулічоў

У гаспадынь ёсць свае сакрэты велікодных булак. Многія ж землякі карыстаюцца паслугай Асіповіцкага хлебазавода, які ўжо не першы год радуе сваіх пакупнікоў смачнай прадукцыяй. Яго кулічы, булкі, кексы заўсёды вабяць прыемным водарам і разнастайным дызайнам.

Да сёлетняга свята хлебапёкамі будзе выпушчана 25 тысяч булачных вырабаў з прыгожымі назвамі “Вербны”, “Графскі”, “Вясна-красна”, “Пасхальный”, “Торжество. Новый”, “Белорусский пасхальный”. Выпякаюцца яны вагой па 300, 400, 500 грамаў. Упакоўваюцца сімвалічныя па-частункі ў цэлафанавыя пакеты — празрыстыя альбо з яркімі тэматычнымі малюнкамі. Тэрмін захавання кулічоў — да 14 сутак.

У асноўным узгаданы асартымент на лінейцы ўжо не першы год, рэцэптура апрабаваная. Улічаны таксама і водгукі спажыўцоў. Як заўсёды, выкарыстоўваюцца толькі натуральныя інгрэдыенты. Штучныя араматызатары цалкам выключаны. Дражджавое цеста ўтрымлівае шмат цукру, плюс цукаты, разынкі, мак. Зверху вырабы ўпрыгожаны цукровай глазурай, дэкаратыўнымі кветкамі і пасыпкай, каляровым шакаладам.

Днямі на прадпрыемстве пабываў благачынны Асіповіцкай акругі протаіерэй Васілій Белавус, які правёў малебен і блаславіў калектыў на выпуск велікоднай прадукцыі.

Набыць яе можна як у фірменных кропках — пры хлебазаводзе, па вуліцы Сацыялістычнай, 18б, на гарадскім рынку, — так і ў іншых прадуктовых магазінах раёна. Сёлета для яшчэ большай зручнасці гараджан з учарашняга дня па суботу гандаль прадукцыяй арганізаваны каля загса, на вакзале, па вуліцы Рабоча-Сялянскай. Сёння прадаюцца булкі і на рынку ў Ялізаве.

Дарэчы, асіповіцкі куліч пашырае геаграфію продажаў штогод. Да ранейшых Светлагорскага, Жлобінскага, Бабруйскага, Пухавіцкага, Чэрвенскага, Дзяржынскага, Мінскага раёнаў дабавіліся яшчэ Магілёў і Слуцк.

Паклапаціліся пекары і пра сваіх ветэранаў: кожны з былых работнікаў атрымае сімвалічны пачастунак. Не застануцца без кулічоў і цяперашнія работнікі. А таксама і нашых медыкаў вырашана не пакінуць без смачных святочных вырабаў, якія будуць перададзены ім у бліжэйшы час.