На дарогах часта сустракаюцца так званыя стыхійныя рынкі, дзе прадаюцца садавіна-гародніна, грыбы-ягады ды іншая дробязь. Iснуе падобнае і на трасе Мінск-Гомель, якая праходзіць па тэрыторыі раёна. Падчас сезона некалькі дзясяткаў землякоў становяцца прадаўцамі, у асноўным — пенсіянеры.

Адна з самых бойкіх несанкцыянаваных гандлёвых кропак — непадалёк ад горада, за развязкай у бок Бабруйска. Там звычайна збіраецца чалавек  5-6. Тавары выстаўляюцца, у лепшым выпадку, на невялікія складныя столікі, а то і проста на зямлю. I пачынаюцца хвіліны-гадзіны чакання пакупнікоў-вадзіцеляў, якія едуць хто куды па сваіх справах. Як вядома, законам забаронена гандляваць на ўзбочыне, якая не абсталявана спецыяльнымі прылаўкамі. Зараз у раёне ідзе месячнік па навя-дзенні парадку на зямлі і добраўпарадкавання тэрыторый, і карэспандэнт “АК” разам з работнікамі ДАI і аддзела эканомікі райвыканкама выехала на аўтатрасу М-5.

— Пытанне незаконнага размяшчэння гандлёвых аб’ектаў у палосах аўтамабільных дарог не новае, — гаворыць галоўны спецыяліст сектара ганд-лю і паслуг аддзела эканомікі райвыканкама Ала Пінчук. — Звяртаемся да яго штогод падчас сезона. Узаемадзейнічаем з аўтаінспекцыяй і іншымі надзорнымі службамі, у тым ліку — санстанцыяй. Штогод уносім карэктывы ў рашэнні райвыканкама, якія тычацца ўзгаданай праблемы. Праводім рэйды, гутарым з парушальнікамі, папярэджваем аб недапушчэнні такіх паводзін, запрашаем на адміністрацыйныя камісіі, складаем пратаколы, аднак усе гэтыя меры пакуль не даюць станоўчых вынікаў. Не дапамагаюць і тры абсталяваныя пляцоўкі, якія з’явіліся вясной на 110-м, 97-м і 90-м кіламетрах трасы Мінск-Гомель.

У гэтым хутка ўпэўніваемся. Збочыўшы ў Цяплухах з маста ў бок Бабруйска, бачым некалькі чалавек, якія чынна ўладкаваліся ўздоўж дарогі з грыбамі-венікамі ў чаканні пакупнікоў. Не надта напалохаўшыся, што каля іх спынілася машына аўтаінспекцыі, сабраліся групкай і пачалі дружна патрабаваць абсталяваць на гэтым месцы прылаўкі — бо да “веснавых” ездзіць далекавата. Ала Пінчук і старшы інспектар ДАI Аляксей Джулай паразмаўлялі з правапарушальнікамі, узгадалі аб адказнасці, што нясе грамадзянін, які гандлюе ў несанкцыянаваных месцах, і людзі пачалі марудна складваць тавар, каб пераехаць на абсталяваную пляцоўку.

Наступны прыпынак праз некалькі кіламетраў, непадалёк ад паварота на Замошша: па абодва бакі трасы прапаноўвала грыбы-ягады сямейная пара. Муж з жонкай таксама пачалі збірацца да ад’езду пасля праведзенай прафілактычнай гутаркі…