Ва ўстановах сярэдняй адукацыі пачаліся восеньскія канікулы.Як праводзяць іх навучэнцы Асіповіччыны, пацікавіліся ў аддзеле па адукацыі райвыканкама.  Працуе 20 школьных лагераў, у якіх бавяць час 280 хлопчыкаў і дзяўчынак. Некаторыя адпраўляюцца на экскурсіі або да бабулі і дзядулі. А для многіх гэта час заняцца любімай справай. Напрыклад, выхаванцы раённага цэнтра творчасці дзяцей і моладзі ахвотна наведваюць гурткі і аб’яднанні, якія працуюць у канікулярны час на поўную магутнасць, ды і дзецям няма неабходнасці спяшацца рабіць урокі, а таму можна цалкам прысвяціць сябе цікаваму занятку. А напрамкі дзейнасці тут на любы густ: тэатральна-мастацкая, дэкаратыўна-прыкладная, тэхнічная, біёлага-экалагічная, турысцка- экскурсійная…

У час гэтых канікул некаторыя формы работы з рабятамі пераносяцца ў анлайн-рэжым. Напрыклад, кіраўнік аддзялення  грамадска-гуманітарнай дзейнасці Ганна Бабчанок распрацавала для малодшых школьнікаў інтэрактыўную віктарыну “Мая Радзіма — Беларусь”, якая будзе праводзіцца з наведвальнікамі школьных лагераў. Рабяты змогуць прадэманстраваць веды пра сваю краіну з розных абласцей: геаграфіі, мовы, гісторыі.

А з тымі, хто праводзіць канікулы дома, педагогі цэнтра таксама арганізоўваюць заняткі     з прымяненнем новых тэхналогій, напрыклад, дыстанцыйныя  мерапрыемствы па бяспецы паводзін.