Той жа, але новы

У жыхароў мікрараёна № 1 — добрая падзея: пасля рамонту адчыніла свае дзверы аддзяленне ЦБП № 722 ААТ “ААБ Беларусбанк”.

…А дванаццатай гадзіне каля святочна прыбранага ганка пачалі збірацца гледачы і першыя кліенты — бела-зяленыя паветраныя шары стварылі неабходную святочнасць. З прамовай да калектыву і гасцей звярнуліся дырэктар ЦБП № 722 Аляксандр Падлужны і яго намеснік Вольга Карчэўская. Потым Аляксандр Мікалаевіч урачыста ўручыў кіраўніку аддзялення Тамары Татур сімвалічны ключ і разам з ёй разрэзаў чырвоную стужку.

Рамонт тут правялі дастаткова хутка: пачалі ў студзені — у ліпені завяршылі. Адбыліся кардынальныя змены: ад сучаснага дызайна да выкарыстання навейшых тэхналогій. Каб кліентам было зручней, у памяшканні банкаўскага аддзялення выдзелены 3 зоны: абслугоўвання, чакання і рэсэпшн. Працуюць 3 касы, у тым ліку VIP-кабіна. Ёсць адкрытае працоўнае месца, якое дазваляе карыстацца новай формай абслугоўвання: не праз шкло, а твар у твар. Адметна і тое, што ў аддзяленні з’явіўся знешні інфакіёск з функцыяй cash-in — магчымасцю праводзіць банкаўскія аперацыі наяўнымі грашыма. У сувязі з гэтым плацяжы за мабільную сувязь і на рахунак інтэрнэт-правайдараў у касах аддзялення прымацца не будуць. Выключэнне зрабілі толькі зараз, пакуль не наладзяць стабільную працу знешняга абсталявання.

Усяго тут працуюць 5 чалавек, сярэдні ўзрост якіх — 42 гады. Калектыў вопытны і правераны. I верыцца, што супрацоўнікі будуць заўсёды адпавядаць новым стандартам абслугоўвання, забяспечаць высокі ўзровень кліенцкага сэрвісу і дасягнуць значных вынікаў у сваёй працы!

Дарэчы, гэта святочная падзея адбылася напярэдадні другой, не менш адметнай: 8 жніўня 1944 года ў Асіповічах пачала прымаць кліентаў цэнтральная ашчадная каса № 2756 пад кіраўніцтвам Алены Палянскай. Таму — з 70-годдзем цябе,  ЦБП № 722 філіяла № 703 ААТ “ААБ Беларусбанк”!

Марыя ТАЛЕЙКА.