Днямі падведзены вынікі конкурсу на лепшых арганізатараў падпіскі газеты “Асіповіцкі край”, які быў аб’яўлены “раёнкай” у снежні — на піку падпісной кампаніі-2014. Аналіз дадзеных паказаў, што арганізатары не памыліліся: колькасць землякоў, якія спынілі свой выбар менавіта на гэтым выданні, узрасла. Асаблівай павагі заслугоўвае работа паштальёна гарадскога аддзялення сувязі № 5 Ніны Міхайлоўскай, на асабістым рахунку якой 256(!) выпісаных экзэмпляраў.

Грашовыя прэміі ад рэдакцыі “АК” атрымаюць Ліпенскае і Каменіц-кае аддзяленні сувязі. Першае выпісала 136 экзэмпляраў, павялічыўшы асабісты вынік роўна на два дзясяткі — 117,2% да леташняга аналагічнага паказчыка, другое — 56, рост — 140%. Дарэчы, для сельскіх аддзяленняў сувязі адной з умоў спаборніцтва была колькасць выпісаных “раёнак” не менш за паўсотні. Хоць і не сталі пераможцамі, але дастойныя слоў падзякі паштавікі з Верайцоў, якія павялічылі падпіску амаль удвая: 28 асобнікаў супраць 15 у мінулым годзе, і Сасновага, дзе лічба вырасла з 35 да 46.

Ну а лідарам стала гарадское аддзяленне сувязі № 4: плюс у графе “Асіповіцкі край” склаў 99 экзэмпляраў, а рост — 121,7%. Сюды і завітала “дэлегацыя” на чале з галоўным рэдактарам Віталем Кулаковым, каб падзякаваць партнёрам за плённую працу.

Як расказала загадчыца аддзялення сувязі Наталля Калола, падпіску ажыццяўляў увесь калектыў — аператары Ларыса Санковіч і Крысціна Дзівак, паштальёны Вольга Баброва, Юлія Баркоўская, паштальён-аператар Вольга Валасевіч. Нельга сказаць, што перамога ў конкурсе была галоўным стымулам — дзяўчаты проста добрасумленна выконвалі свае абавязкі. У гутарцы выявілася, што перавагу “раёнцы” аддаюць гараджане рознага веку — людзі сталыя, сярэдняга ўзросту, моладзь. Дарэчы, самі працаўнікі аддзялення сувязі таксама з задавальненнем падпісваюцца на наша выданне.

“Ведаем, што газета цікавая, таму смела прапаноўвалі землякам аформіць даставачную картку на яе”, — падзяліліся паштавікі.

Пастараемся і надалей трымаць марку!

Фота Ніны ЦАРЫК.