У інтэрнэце праводжу дастаткова шмат часу: патрабуецца па рабоце, ды і не апошняе месца займае цікавасць да рознай інфармацыі. У першую чаргу, безумоўна, звяртаю ўвагу на тое, што пішуць мясцовыя рэсурсы, чым жывуць землякі. А ўчора трапілася адно відэа ў сетцы “ВКонтакте”, якое выклікала шмат неадназначных эмоцый: юная асоба са смакам знішчае (і дзе толькі сілы ўзяліся ў дзяўчыны?) скульптуру аляняці ў нашым гарадскім парку. Памятаецца, наколькі архітэктурная форма ў выглядзе трох аленяў, якую ў сакавіку 2020 года з любоўю стварылі ў падарунак гораду і яго жыхарам працаўнікі УКП ЖКГ, выдаткаваўшы значныя сродкі і нямала часу, упадабалася землякам і стала адной з самых папулярных фотазон райцэнтра.

Здзівіла адразу некалькі рэчаў. Дзея адбываецца ў светлы час сутак, па дарозе рухаюцца аўтамабілі, непадалёку — прахожыя. Гэта ж колькі трэба мець смеласці (ці бессаромнасці), каб учыніць вандалізм, можна сказаць, навідавоку ва ўсіх. Відэа мае агучку, і, калі адтуль выдаліць нецэнзурныя словы, то яно атрымаецца… бязгучным.

Уражвае і абсалютная адсутнасць розуму ў “крэатыўшчыкаў”: зняць на камеру хуліганства і выкласці ў сеціва, каб глумленне стала даступным для абмеркавання шырокай грамадскасці. Такі вось “подзвіг”. Мабыць, у гэты час выявы людзей на помніках з суседняй Алеі Герояў заліліся чырванню ад крыўды і сораму…

Ну а самае выразнае пачуццё, якое засталося пасля прагляду, — роспач. Чаму так адбываецца, якія думкі гулялі ў юным розуме, што прывялі да такіх дзеянняў? У чым памылка бацькоў, педагогаў у выхаванні падрастаючага пакалення? Што мы робім не так, дзе шукаць прабел? Здаецца, выхаваўчы працэс наладжаны правільна, магчымасцей у маладога пакалення для самавыражэння безліч. Чаму тады акцэнты расстаўляюцца такім непрывабным чынам?

Вельмі хочацца спадзявацца, што дзяўчына, калі стане больш дарослай, усё ж будзе добрым чалавекам, жонкай (толькі не таго хлопца, які здымаў яе на відэа), матуляй. А гэты выпадак назаўсёды застанецца брыдкім успамінам, які будзе выклікаць сарамату і думку: “Хіба гэта я?” А пакуль цвяроза паглядзець на рэчы ёй павінна дапамагчы адміністрацыйнае пакаранне, пажадана, з такім штрафам, каб перакрыць усе выдаткі і назаўсёды адбіць ахвоту да “геройства”.