Так нараджаюцца вагоны

Ажыўлена зараз у магутным вытворчым цэху ААТ “Асіповіцкі завод транспартнага машынабудавання”. На прадпрыемстве працуе больш за чатыры сотні чалавек, і яны без справы не сумуюць. Датычна вагонаў, тут асвоены выпуск шасці іх відаў, сёння на лінейцы, у адпаведнасці з заказамі, знаходзіцца тры: вагоны-цыстэрны для нафтапрадуктаў, вагоны-платформы 80-фу-тавыя для перавозкі буйнагабарытных кантэйнераў, вагоны-платформы ўніверсальныя, на якіх транспарціруецца рознага віду тэхніка і грузы, што не патрабуюць засцярогі ад атмасферных ападкаў.

Так, толькі за май прадпрыемствам было адгружана ў Расійскую Федэрацыю і айчынным партнёрам 190 адзінак прадукцыі. Планы на лета — адпраўляць заказчыкам па 80 вагонаў-цыстэрн і вагонаў-платформ.

У чэрвені цыстэрны накіруюцца ў Азербайджан і Расійскую Федэрацыю, 80-футавыя платформы — таксама ў Расію, а 40-футавыя ўніверсальныя — беларускаму акцыянернаму таварыству “Крычаўцэментнашыфер”.

— Вытворчасць і адгрузка прадукцыі ажыццяўляецца ў адпаведнасці з бізнес-планам прадпрыемства-2023, — расказвае дырэктар АЗТМ Сяргей Кузьміч. — Увогуле працуем зараз рытмічна, заказы ёсць, кантракты заключаны да 2025 года, што гарантуе пэўную стабільнасць. У сувязі з гэтым дадаткова набіраем яшчэ шэраг работнікаў. Так што тыя землякі, хто не працаўладкаваны, могуць звяртацца на завод.