РАУС
У перыяд з 15 па 21 ліпеня раскрыты раней здзейснены крадзеж, устаноўлена месца знаходжання трох асоб, якія знаходзіліся ў вышуку.
Скончыў жыццё самагубствам непрацуючы 39-гадовы асіпаўчанін.
17 чысла ў ЦРБ быў шпіталізаваны 25-гадовы жыхар Любанскага раёна. Мужчына знаходзіўся ў стане алкагольнага ап’янення і меў небяспечную нажавую рану грудзей. Як высветлілася, цяжкае цялеснае пашкоджанне пацярпеламу нанёс сабутэльнік — 36-гадовы брэстчанін падчас спрэчкі, якой скончылася сумеснае застолле. Затрыманы злачынца раней ужо быў судзімы за крадзеж і ўхіленне ад выканання бацькоўскіх абавязкаў.
ДАI
Спынена 156 парушэнняў правілаў руху, прыцягнута да адказнасці 9 п’яных вадзіцеляў, 52 парушальнікі хуткаснага рэжыму, пешаход без святлоадбіваючых элементаў на адзенні і веласіпедыст, чый двухколавы транспартны сродак не быў абсталяваны белым ліхтаром спераду і чырвоным — ззаду. Адбылося 9 ДТЗ.
16 ліпеня ў цёмны час сутак вадзіцель «БМВ», які рушыў па вул. Сташкевіча, не справіўся з кіраваннем на слізкім — пасля дажджу — асфальце і вылецеў у кювет на перакрыжаванні з вул. 60 гадоў Кастрычніка. Пры «таране» бардзюра цяжкая машына моцна дэфармавала літыя дыскі на колах, а потым угрузла ў мяккі грунт, таму эвакуацыя «пацярпелай» з месца аварыі аказалася вельмі складанай справай. Дастаткова сказаць, што пры спробе зрушыць «БМВ» з месца эвакуатарам ад яе насавой часткі быў адарваны ладны кавалак.
Увага! 26 ліпеня праводзіцца адзіны дзень інфармавання пад дэвізам «Пристегни себя и своих пассажиров». Яго мэта — прапаганда сродкаў пасіўнай бяспекі для ўдзельнікаў дарожнага руху.
АУСТ
Складзены 91 адміністрацыйны пратакол, у тым ліку на 3 пасажыраў, знятых з паяздоў за неадэкватныя паводзіны.
Узбуджаны крымінальныя справы па фактах крадзяжу мабільнага тэлефона на вакзале станцыі Асіповічы, рабаўніцтва на прывакзальнай плошчы і знікнення значнай сумы грошай у пасажыркі дызель-цягніка Магілёў-Асіповічы. Злачынцаў, здзейсніўшых два першыя супрацьпраўныя ўчынкі, удалося затрымаць па «гарачых слядах», а вось высветліць, хто ўкраў 1.200 еўра, 100 долараў ЗША і 150 тысяч беларускіх рублёў, пакуль яшчэ не ўдалося.
Дэпартамент аховы
Спынена дробных крадзяжоў — 4, парушэнняў ПДР і антыалкагольнага заканадаўства — па 3, хуліганства — 1.
Медвыцвярэзнік
Аказана дапамога 26 мужчынам і 5 жанчынам.
IАЖіРС
Складзена 5 пратаколаў па фактах знаходжання каля вадаёма з забароненымі рыбалоўнымі прыладамі, забруджвання ляснога фонду і водаахоўнай зоны, паркоўкі аўтамабіля ў непасрэднай блізкасці ад берага і браканьерскай лоўлі рыбы.