РАУС
У перыяд з 8 па 14 ліпеня зарэгістраваны 3 крадзяжы і столькі ж выпадкаў самагонаварэння. Раскрыта 2 раней здзейсненыя злачынствы, выяўлены факт неабгрунтаванага пералічэння 9,5 млн. рублёў з дзяржбюджэту на разліковы рахунак гандлёвай арганізацыі ў 2012 годзе. Знік без вестак 15-гадовы падлетак.
У ноч з 8 на 9 чысло невядомы зламыснік угнаў аўтамабіль “ВАЗ-2106”, пакінуты гаспадаром каля свайго дома. Праз дзень машына ў тэхнічна спраўным стане была знойдзена каля п. Сасновы.
11 ліпеня адбыўся чарговы крадзеж металічных слупкоў, якія ўстанаўліваюцца ўздоўж шашы Мінск-Гомель. На гэты раз з месца мантажу — участку дарогі каля вёскі Смык — знікла 7 элементаў агароджвання агульным коштам каля 2 млн. рублёў.
РАСК
Узбуджана 4 крымінальныя справы. Сярод іх — крадзеж 6,1 млн. рублёў з незачыненага багажніка аўтамабіля, літаральна на 10 хвілін пакінутага індывідуальным прадпрымальнікам з Мінска каля асіповіцкага рынку.
ДАI
Спынена 167 парушэнняў правілаў руху, прыцягнута да адказнасці 4 п’яныя вадзіцелі, 103 парушальнікі хуткаснага рэжыму, пешаход без святлоадбіваючых элементаў на адзенні. Адбылося 7 ДТЗ.
11 чысла ў 4 гадзіны раніцы аўтамабіль “Опель-Кадзет” пры заездзе на паркоўку каля крамы райста ў Ялізава збіў матацыкліста, які атрымаў шматлікія пераломы і чэрапна-мазгавую траўму. Вадзіцель, па неасцярожнасці якога адбылося ДТЗ, своечасова не правёў тэхагляд машыны і нават не памяняў зімовыя шыны на летнія. Прынамсі, ёсць пытанні і да тэхнічнага стану матацыкла: транспартны сродак не мае рэгістрацыйных нумароў з усімі выцякаючымі з гэтай “драбязы” наступствамі.
У той жа дзень неўстаноўленая машына збіла 16-гадовага юнака каля в. Канцы. Пацярпелы быў шпіталізаваны, але 12 ліпеня памёр ад атрыманых цялесных пашкоджанняў.
13 чысла на вул. Юбілейнай вадзіцель аўтамабіля “ВАЗ-21074” пры павароце налева не прапусціў машыну той жа мадэлі, якая мела пераважнае права праезду. У выніку сутыкнення пасажырка парушыўшага правілы руху “ВАЗа” атрымала цялесныя пашкоджанні.
Маленькі нюанс: вадзіцель-парушальнік, які карыстаўся чужой машынай, не маючы правоў кіравання, “падбіў”… патрульную машыну ДАI.
АУСТ
Складзена 73 адміністрацыйныя пратаколы, у тым ліку на 5 пасажыраў, знятых з паяздоў за неадэкватныя паводзіны. Затрымана 3 асобы, якія знаходзі-ліся ў вышуку. Узбуджана крымінальная справа па факце крадзяжу маёмасці ў пасажыра.
Падчас правядзення аперацыі “Мак” ліквідавана плантацыя дзікарослых канопляў. Знішчана каля 2 кг наркаўтрымліваючай расліны.
Медвыцвярэзнік
Дастаўлены 31 чалавек, пакінута для працверажэння 23 мужчыны і 2 жанчыны. “Эвакуацыю” перапіўшых грамадзян з месцаў грамадскага карыстання праводзілі нарады патрульна-паставой службы — 14, АУСТ — 5, супрацоўнікі аддзела Дэпартамента аховы і ўчастковыя інспектары міліцыі — па 3.
РАНС
11 чысла ў адным з масіваў прыватнай забудовы ў Асіповічах згарэў хлеў. З-за шчыльнага размяшчэння пабудоў агонь пагражаў перакінуцца на два суседнія жылыя дамы, аднак пажар удалося свое-часова лакалізаваць. Прычына надзвычайнага здарэння — дзіцячая гульня з агнём.
IАЖіРС
Затрыманы рыбак, якога за паўторную на працягу года незаконную здабычу рыбы чакае крымінальная адказнасць. Выяўлена 3 парушэнні вядзення паляўнічай гаспадаркі.
Надвячоркам 12 чысла цягнік Асіповічы-Градзянка збіў дзве самкі зубра, якія пераходзілі пуці. Жывёліны ва ўзросце 5-8 гадоў загінулі адразу, прычым іх тушы атрымалі настолькі моцныя пашкоджанні, што выкарыстанне далікатэснага зубрынага мяса для харчовай прамысловасці прызнана немагчымым.