АДАІ РАУС за тыдзень перасечана 38 парушэнняў правілаў дарожнага руху, прыцягнута да адказнасці 7 “бяспраўнікаў”, 4 нецвярозыя вадзіцелі і 1 пешаход, які не меў святлоадбіваючых элементаў на адзенні, аднак знаходзіўся “пад мухай”.

23 чысла на перакрыжаванні вуліц Сумчанкі і Юбілейнай легкавая машына пры павароце ўлева збіла адразу двух пешаходаў, у тым ліку непаўналетняга. Абодва пацярпелыя былі шпіталізаваны ў ЦРБ.

Аддзелам Дэпартамента аховы прыцягнута да адказнасці 3 асобы, якія здзейснілі дробныя крадзяжы, і столькі ж — хуліганаў, па 2 сямейныя скандалісты і парушальнікі правілаў дарожнага руху, 1 грамадзянін, што ў нецвярозым стане знаходзіўся ў месцы грамадскага карыстання.

ІАЖіРС складзена 4 адміністрацыйныя пратаколы па фактах карыстання незаконнымі прыладамі для рыбалоўства — сеткамі-пад’ёмнікамі — і 3 — парушэння правілаў лесанарыхтовак. Найбольшы ўрон лясным угоддзям — яго фінансавы эквівалент 35,1 базавай велічыні — быў нанесены арганізацыяй-лесараспрацоўшчыкам, работнікі якой ссеклі 10 насенных дрэў, 5 дрэў за межамі выдзеленай лесасекі і пры гэтым пакінулі на ёй 54 м3 лесу, што павінны былі ссекчы і вывезці.