Супрацоўнікамі АДАІ РАУС з 29 лістапада па 5 снежня зарэгістравана 12 ДТЗ, амаль усе звязаныя са змяненнем пагодных умоў; папярэджана165 парушэнняў, пакараны тры п’яныя вадзіцелі; чатыры “бяспраўнікі”; дзевяць аўтааматараў, якія не прытрымліваліся патрабаванняў правіл перавозкі дзяцей, тры — што не прадаставілі пешаходам перавагу ў руху; 25 веласіпедыстаў і пешаходаў, 10 з якіх былі нецвярозыя.

Увага! Па 12 чысло Дзяржаўтаінспекцыя арганізуе прафілактычныя мерапрыемствы для прадухілення няшчасных выпадкаў з уразлівымі ўдзельнікамі дарожнага руху.

Аддзелам Дэпартамента аховы прыцягнуты да адказнасці чатыры асобы, што здзейснілі дробныя крадзяжы, дзве — дробнае хуліганства.

Па даных РАНС, 29 чысла агнём пашкоджана маёмасць прыватнага жылога будынка на вул. Голанта ў райцэнтры. Як аказалася, уладальнікі пастаянна не жывуць у доме, але часта прыходзяць, каб прапаліць у печы. У адпаведнасці з папярэднімі данымі, ад гарачай печы загарэўся матрац, які шчыльна прылягаў да яе.

5 чысла ў выніку пажару ў прыватным гаражы на вул. Валадарскага пашкоджаны дах і маёмасць. У будынку знаходзілася два аўтамабілі “Пяжо”: адзін знішчаны агнём, другі сур’ёзна абгарэў. Папярэдне прычынай узгарання стала самаробная буржуйка, у непасрэднай блізкасці ад якой гаспадар захоўваў дровы.

Памятайце: пры эксплуатацыі пячнога ацяплення своечасова ачышчайце комін ад сажы, пазбаўцеся ад расколін у коміне і печы, прыбіце прадтопачны ліст памерам 50×70 см, не перагравайце печ.

ІАЖіРС складзены чатыры адміністрацыйныя пратаколы па фактах парушэння правіл лесакарыстання.