РАУС

У перыяд з 19 па 25 кастрычніка раскрыты крадзеж, знойдзены труп без бачных прыкмет гвалтоўнай смерці, зарэгістравана 4 факты парушэння антыалкагольнага заканадаўства, канфіскавана 210 літраў брагі і 1 — самагону.

Ноччу 19 чысла з траўмамі галавы ў бальніцу дастаўлены мужчына — яго напярэдадні ўдарыла качаргой сястра.

Праводзіцца праверка па паведамленні адміністрацыі райста аб тым, што невядомая асоба шляхам падкопу пранікла ў ангар і, узламаўшы кунг аўтамабіля ГАЗ, выкрала спіртныя напоі і прадукты харчавання.

РАСК

Узбуджана 13 крымінальных спраў, 3 з іх — супраць абавязаных асоб, якія наўмысна не выходзілі на працу, ухіляючыся ад пакрыцця расходаў, затрачаных дзяржавай на ўтрыманне непаўналетніх дзяцей.

Дзве справы заведзена супраць 29-гадовага асіпаўчаніна. Асуджаны судом да выпраўленчых работ і пазбаўлены права кіравання транспартнымі сродкамі, ён ухіліўся ад выканання прысуду і ў стане алкагольнага ап’янення сеў за руль аўтамабіля.

Непрацуючы грамадзянін у краме індывідуальнага прадпрымальніка паквапіўся на джынсы коштам 380 тысяч рублёў. Неўсталяваная асоба выкрала мабільны тэлефон з курткі, пакінутай без нагляду ў калідоры паліклінікі. Усяго па крадзяжах маёмасці распачата 7 крымінальных спраў.

ДАI

Папярэджана 159 фактаў парушэння правілаў дарожнага руху, да адказнасці прыцягнуты 12 парушальнікаў хуткаснага рэжыму, 41 пешаход, нецвярозы вадзіцель. Адбылося 5 ДТЗ.

19 кастрычніка вадзіцель аўтамабіля “Хёндай” наехаў на веласіпедыста, які перасоўваўся на зялёны сігнал святлафора па пешаходным пераходзе.

ДАI нагадвае: У сувязі з надыходам асенне-зімовага сезона яшчэ больш актуальным становіцца выкарыстоўванне святлоадбіваючых элементаў вопраткі. За знаходжанне на неасветленым участку дарогі без САЭ прадугледжаны штраф ад 1 да 3 базавых велічынь, у стане алкагольнага ап’янення — да 5 БВ.

АУСТ

Складзена 87 адміністрацыйных пратаколаў, знойдзена 3 асобы, што знаходзіліся ў вышуку, суправоджана 70 цягнікоў, з іх знята 6 правапарушальнікаў. У спецізалятар дастаўлены 1 грамадзянін.

Увага! З 29 па 31 кастрычніка праводзіцца спецыяльны комплекс мерапрыемстваў “Прыгарадны цягнік”.

Спецізалятар

Для працверажэння размешчана 38 мужчын і 1 жанчына.

IАЖіРС

Складзена 3 адміністрацыйныя пратаколы за выкід трупаў буйной рагатай жывёлы, 2 — за пакіданне ў неналежным месцы каністр з-пад гербіцыдаў. Узбуджана крымінальная справа па факце крадзяжу сажалкавай рыбы.