РАУС

У перыяд з 13 па 19 ліпеня зарэгістравана 13 супрацьпраўных учынкаў: крадзеж — 6, выраб самагону — 5, нанясенне цялесных пашкоджанняў — 2. Знойдзены 4 трупы без прыкмет гвалтоўнай смерці. Узбуджана 9 крымінальных спраў, з якіх 3 — у адносінах да абавязаных асоб, якія ўхіляюцца ад работы. Раскрыты 4 раней здзейсненыя злачынствы. Канфіскавана ў грамадзян звыш 100 літраў брагі.

18 ліпеня ў ЦРБ з траўмамі, нанесенымі ў спрэчцы на ніве непрыязных адносін рабочым аднаго з прадпрыемстваў горада Чавусы, быў дастаўлены 34-гадовы непрацуючы  асіпаўчанін. У гэты ж дзень медыкі шпіталізавалі асіпаўчаніна з рванай ранай 5-га пальца левай рукі, цялесныя пашкоджанні атрыманы пасля ўзрыву дэтанатара.

17 і 19 чысла затрыманы аўтамабілі “Опель-Астра” і “Фольксваген ЛТ 35”, у якіх без суправаджальных дакументаў знаходзіўся тавар: у першым асіпаўчанка перавозіла   верхняе адзенне і абутак на суму 61.068.000 рублёў, у другім жыхар Віцебска — дываны і паласы коштам 65.800.000 рублёў.

На працягу тыдня супрацоўнікамі міліцыі было знішчана больш за 160 кілаграмаў дзікарослай каноплі.

У адносінах да невядомай асобы ўзбуджана крымінальная справа па факце крадзяжу з аднаго з дамоў в. Рафалін прадметаў дамашняга ўжытку на суму 1.325.000 рублёў.

Задаволена хадайніцтва АУСТ па прыцягненні да крымінальнай адказнасці 33-гадовага жыхара Вязаўніцы, які, знаходзячыся ў стане алкагольнага ап’янення, нажом нанёс лёгкія цялесныя пашкоджанні сужыцельніцы.

ДАI

Спынена 112 парушэнняў правілаў руху. Прыцягнута да адказнасці 8 пешаходаў, 5 п’яных вадзіцеляў, 7 чалавек — за перавышэнне хуткасці. Здзейснена 2 ДТЗ.

16 ліпеня прыкладна ў 19 гадзін вадзіцель, які рухаўся з боку Бабруйска ў бок Свіслачы, кіруючы аўтамабілем “Фольксваген Каравела“ каля в. Вуглата пры павароце налева не прапусціў скутар “Рэйсер”, які рухаўся ў сустрэчным кірунку. Адбылося сутыкненне, у выніку якога вадзіцель апошняга атрымаў цялесныя пашкоджанні і апынуўся ў бальніцы.

З 16 па 23 ліпеня праводзяцца мерапрыемствы па выяўленні і прадухіленні фактаў кіравання транспартнымі сродкамі асобамі, якія не маюць права на кіраванне.

АУСТ

Прыцягнута да адказнасці 12 правапарушальнікаў. Узбуджана 2 крымінальныя справы. Складзена 72 адміністрацыйныя пратаколы. Суправоджаны 61 цягнік, дзе затрымана 12 чалавек. Знойдзены 2 асобы, якія знаходзіліся ў вышуку. У спецізалятар дастаўлена 4 чалавекі.

Спецізалятар

Дастаўлена для аказання дапамогі 23 чалавекі, з іх — 21 мужчына і 2 жанчыны.

РАНС

Зарэгістраваны 2 пажары.

16 чысла ў вёсцы Сухлава адбылося ўзгаранне дома — пашкоджаны дах і сцены.

Двума днямі пазней загарэлася адна з кватэр па вул. Сташкевіча. Знішчана маёмасць кухні, пашкоджана столь у 2 пакоях.

У абодвух выпадках прычыны ўзнікнення пажараў устанаўліваюцца.

IАЖіРС

Складзена 8 пратаколаў: 3 — за парушэнне правілаў рыбалоўства, канфіскавана 5 пад’ёмных сетак агульнай даўжынёй 500 метраў; 5 — збор чарніц забароненымі сродкамі.