РАУС

У перыяд з 28 ліпеня па 3 жніўня зафіксавана па 2 крадзяжы і факты нанясення цялесных пашкоджанняў, 4 парушэнні антыалкагольнага заканадаўства. Ліквідаваны канал распаўсюджвання парнаграфіі праз сацыяльныя сеткі. Раскрыты раней здзейснены крадзеж двух мапедаў. Затрымана збегшая ад суда 24-гадовая жанчына.

Дзве жанчыны — жыхаркі в. Пагарэлае і Асіповіч — скончылі жыццё самагубствам.

Аматар падводнага палявання з-за неасцярожнасці пры зарадцы стрэльбы для падводнага палявання патрапіў сам сабе гарпуном у галаву, атрымаўшы цяжкія пашкоджанні.

Знойдзены трупы трох мужчын, абставіны смерці якіх высвятляюцца. 44-гадовы жыхар в. Цэзарова па папярэдняй інфармацыі патануў у тэхнічным вадаёме каля в. Каменічы. Ва ўласных дамах памерлі 40-гадовы вясковец з Вялікай Гравы і 35-гадовы асіпаўчанін.

Надвячоркам 1 жніўня раней не судзімы 33-гадовы мужчына пасля сумеснага распіцця алкаголю пачаў збіваць рукамі і нагамі сваю 32-гадовую сужыцельку. У выніку пабояў жанчына атрымала сур’ёзныя пашкоджанні ўнутраных органаў, у тым ліку — разрыў кішэчніка.

3 чысла раней судзімы жыхар п. Сасновы на беразе штучнага возера каля в. Смык у прыпадку рэўнасці двойчы ўдарыў нажом сваю жонку. 25-гадовая жанчына шпіталізавана з пранікаючым раненнем брушной поласці і небяспечнай ранай малочнай залозы.

РАСК

Узбуджана 7 крымінальных спраў. У іх ліку 2 — карупцыйнай накіраванасці.

ДАI

Спынена 131 парушэнне правілаў руху, прыцягнута да адказнасці 33 ліхачы, 3 п’яныя вадзіцелі і 5 пешаходаў. Адбылося 6 ДТЗ. Усе аварыі здзейснілі вопытныя і адэкватныя вадзіцелі, якія тлумачылі замаруджанасць рэакцыі на змены дарожнай абстаноўкі ўплывам экстрэмальна высокай тэмпературы паветра.

АУСТ

Складзена 66 адміністрацыйных пратаколаў. Узбуджана 3 крымінальныя справы (махлярства, хуліганства, крадзеж). Затрыманы 2 злачынцы, што знаходзіліся ў вышуку.

РАНС

28 чысла па невядомай прычыне адбыўся пажар на вытворчай тэрыторыі прыватнага лесаапрацоўчага прадпрыемства ў в. Верайцы. Знішчаны дах, пашкоджана столь і часткова — сцены.