РАУС

У ноч на 29 студзеня паблізу в. Майсеевічы з высакавольтнага слупа выкрадзены электрычны трансфарматар. На тэрыторыі прадпрыемства з двух аўтамабіляў “ГАЗ” зніклі бартавыя прылады электроннай аплаты і відэарэгістратар. Нецвярозы мужчына, які раней неаднаразова прыцягваўся да адміністрацыйнай адказнасці, пагражаў забойствам адвёрткай сваёй жонцы; у бальніцу дастаўлены 43-гадовы мужчына, якога пасля сумеснага распіцця спіртнога ўдарыў нажом бацька-пенсіянер. Iндывідуальны прадпрымальнік паведаміў, што ў ноч на 2 лютага нехта маркерам і фарбамі нанёс невядомыя сімвалы на 7 гандлёвых павільёнах, размешчаных на вул. Сумчанкі. У нядзелю супрацоўнікамі АДАI і АБЭЗ на 24 км дарогі Асіповічы-Свіслач затрыманы аўтамабіль, на якім жыхар Ліпеня перавозіў 200 паўлітровых бутэлек немаркіраванай гарэлкі расійскай вытворчасці.

РАСК

Два непрацуючыя асіпаўчаніны падазраюцца ў крадзяжы праз плацежны тэрмінал звыш 83 рублёў з карт-рахунку мясцовай жыхаркі, якая раней страціла сваю банкаўскую картку.

Маёмасць на суму звыш 1159 руб. выкраў у лістападзе жыхар Лучыц з дачнага дома, адрыны і лазні ў в. Булгары.

Службовая асоба ў кастрычніку 2015 года арганізавала выдачу 7500 руб. на нарыхтоўку сельгаспрадукцыі, пасля чаго завалодала 2000 руб.

3 скрынкі з дзіцячымі рэчамі, пакінутыя без нагляду каля пад’езда дома па вул. Сумчанкі, скрадзены невядомымі.

Раней судзімы жыхар Верайцоў выкраў прамысловы пыласос коштам звыш 292 руб. з бытавога памяшкання на будоўлі фізкультурна-аздараўленчага комплексу на вул. Юбілейнай.

Дэпартамент аховы

Да адміністрацыйнай адказнасці прыцягнута 9 парушальнікаў ПДР, 2 і 1 асобы, што здзейснілі дробныя крадзяжы і хуліганства, 5 грамадзян, якія з’яўляліся ў грамадскіх месцах у нецвярозым выглядзе, 6 — за іншыя правапарушэнні.

РАНС

Бабруйчанка 1988 г.н. і яе дачка 2009 г.н. загінулі каля 4 гадзін раніцы 4 лютага на пажары, які адбыўся ў дачным доме ў в. Копча.

IАЖіРС

Узбуджана крымінальная справа па факце незаконнага палявання; складзена 9 адміністрацыйных пратаколаў за парушэнне правілаў лесакарыстання.