РАУС

У перыяд з 9 па 15 чэрвеня зафіксавана 10 крадзяжоў і 9 парушэнняў антыалкагольнага заканадаўства. Скончыў жыццё самазабойствам 18-гадовы жыхар в. Малая Гарожа. Затрыманы 2 даўжнікі, якія ўхіляліся ад выплаты запазычанасці. Раскрыта 2 раней здзейсненыя крадзяжы.

Падчас правядзення аперацыі “Мак” ліквідаваны плантацыі маку і канопляў, якія стварылі на ўласных прысядзібных участках жыхары в. Каменічы і Слабада.

Праводзіцца праверка па факце перавозкі без дакументаў дзвярэй на суму 47,2 млн. руб.

12 чысла ў краме № 7 ААТ “Гандаль” жанчына ўкрала 4 пляшкі гарэлкі і паспела знікнуць да таго, як прапажу маёмасці заўважылі прадаўцы. Зламысніцу — раней ужо судзімую за крадзеж 19-гадовую бабруйчанку  — удалося затрымаць на наступны дзень.

У ноч з 13 на 14 чэрвеня з ахоўваемай тэрыторыі пункта тэхабслугоўвання ДДЛГУ “Асіповіцкі доследны лясгас” было ўкрадзена тэхналагічнае абсталяванне коштам каля 8 млн. руб.

Увага! У перыяд з 16 па 22 чэрвеня на тэрыторыі раёна праводзяцца прафілактычныя мерапрыемствы па прадухіленні рэцыдыўнай злачыннасці сярод раней судзімых асоб.

РАСК

Узбуджана 12 крымінальных спраў, у тым ліку па факце нападзення 36-гадовага асіпаўчаніна на фельчара Асіповіцкай хуткай медыцынскай дапамогі. Раней не судзімы мужчына знаходзіўся ў стане цяжкага алкагольнага ап’янення, і машына “хуткай дапамогі” вязла яго ў райбальніцу. Па дарозе пацыент пачаў праяўляць агрэсіўнасць і ўдарыў медработніка кулаком у твар.

ДАI

Спынена 183 парушэнні правілаў руху, прыцягнута да адказнасці 76 вадзіцеляў-“ліхачоў” і 11 — у стане алкагольнага ап’янення. Адбылося 5 ДТЗ. Усе — з-за няўважлівасці пры манеўраванні на стаянках. Самая недарэчная аварыя адбылася на АЗС № 56: сутыкнуліся дзве машыны, якія ад’язджалі ад паліўных тэрміналаў.

Увага! На працягу гэтага тыдня АДАI робіць акцэнт на выяўленне вадзіцеляў, якія садзяцца за руль у нецвярозым стане альбо без правоў.

АУСТ

Складзены 73 адміністрацыйныя пратаколы. Затрыманы 2 злачынцы, на якіх быў аб’яўлены вышук.

IАЖіРС

Прыцягнуты да адміністрацыйнай адказнасці  4 браканьеры-рыбакі. Перасечана спроба перавозкі драўніны без належных дакументаў.