РАУС

У перыяд з 18 па 24 ліпеня ўстаноўлена месцазнаходжанне 2 грамадзян, што хаваліся ад суда і следства. 18 ліпеня на вул. Сумчанкі затрыманы жыхар Вяззя, у якога канфіскаваны пакет з макавай саломай. Па факце ўзбуджана крымінальная справа. У той жа дзень у ЦРБ звярнулася асіпаўчанка, збітая ўласным бацькам. 21 ліпеня ў райаддзел паступіла паведамленне ад жыхаркі Дрычына, якой пагражаў забойствам сын. У ЦРБ з траўмамі брыгадай хуткай дапамогі дастаўлены непрацуючы жыхар райцэнтра, які растлумачыў, што ў двары дома па вул. Крыловіча яго збіў невядомы і пры гэтым пагражаў прадметам, падобным на пісталет. У дачыненні грамадзяніна РФ, у якога ў ходзе асабістага догляду быў канфіскаваны траўматычны пісталет, патроны да яго і наручнікі, распачата крымінальная справа. Раскрыты крадзеж коней з малочнатаварнай фермы: злачынства здзейсніла непрацуючая 38-гадовая жыхарка Слуцкага раёна.

РАСК

Пракуратурай раёна распачаты справы ў дачыненні двух асіпаўчан: адзін з іх 23 красавіка на вул. Сташкевіча збіў чалавека моташлемам, другі ў той жа дзень на вул. Сонечнай нанёс грамадзяніну цялесныя пашкоджанні кулакамі. Абодва злачынцы былі нецвярозымі.

Непрацуючы раней судзімы мужчына ў сярэдзіне чэрвеня скраў на гарадскіх могілках бронзавыя вазы, лампады і кветкі на суму больш за 2 тысячы рублёў. Выкрадзенае канфіскавана.

ДАI

Папярэджана 90 парушэнняў ПДР, прыцягнута да адказнасці 2 нецвярозыя вадзіцелі і 20, што не прытрымліваліся хуткаснага рэжыму, 14 пешаходаў і веласіпедыстаў, якія ў цёмны час сутак знаходзіліся на праезнай частцы без святлоадбіваючых элементаў. Адбылося 10 ДТЗ.

Увага! Па 31 ліпеня праводзіцца комплекс мерапрыемстваў па прадухіленні ДТЗ з-за парушэння вадзіцелямі хуткаснага рэжыму і правілаў абгону.

Дэпартамент аховы

Да адміністрацыйнай адказнасці прыцягнута 24 чалавекі, у тым ліку 11 асоб, што з’яўляліся ў грамадскіх месцах у нецвярозым выглядзе.

Спецізалятар

Размешчана для працверажэння 53 чалавекі, сярод іх 10 жанчын, 3 пенсіянеры і 13 сямейных скандалістаў.

РАНС

21 ліпеня ў 11.39 паступіла паведамленне, што на тэрыторыі ДУКВП “Водаканал” выяўлена тры металічныя рэзервуары з невядомым газам. Супрацоўні-камі РАНС было ўстаноўлена, што ў адным з рэзервуараў, дзе знаходзіўся хлор, адбылася разгерметызацыя і газ выходзіў у атмасферу. Пашкоджаны 200-літровы балон быў змешчаны ў ёмістасць з водным растворам кальцыніраванай соды, пададзена заяўка на далейшую ўтылізацыю. Замеры паказалі, што дапушчальная канцэнтрацыя газу не перавышае нарматыўных паказчыкаў.

25 ліпеня ў в. Матавіла Ясенскага сельсавета загарэўся хлеў. У выніку пажару знішчаны дах і перакрыцце адрыны, сур’ёзна пацярпела і лазня.

IАЖіРС

Складзена 3 адміністрацыйныя пратаколы за парушэнне правілаў рыбнай лоўлі, 1 — за незаконную парубку лесу.