РАУС

У перыяд з 12 па 18 мая зафіксавана 3 крадзяжы, 5 выпадкаў нанясення цялесных пашкоджанняў, па 2 факты самагонаварэння і гандлю пратэрмінаванымі алкагольнымі напоямі, парушэнне дамовы па аказанні паслуг з боку індывідуальнага прадпрымальніка.

Раскрыта раней здзейсненае злачынства — крадзеж, зафіксаваны ў красавіку-2014.

Скончыў жыццё самазабойствам 26-гадовы жыхар в. Дараганава.

15 мая каля 3 гадзін ночы двое раней не судзімых маладых асіпаўчан без прычыны напалі на выпадковага прахожага і нанеслі яму цялесныя пашко-джанні. Злачынцы выяўлены і затрыманы на працягу сутак.

На наступны дзень у ЦРБ паступіла непрацуючая 35-гадовая жанчына з сур’ёзнымі траўмамі галавы і цела, якія ёй нанёс сужыцель.

18 чысла меддапамога спатрэбілася адразу тром чалавекам, якія атрымалі цялесныя пашкоджанні. 28-гадовы асіпаўчанін і 34-гадовая жыхарка в. Дараганава шпіталізаваны з пранікаючымі нажавымі раненнямі, пашкодзіўшымі лёгкія. Таксама нецвярозым быў і яшчэ адзін асіпаўчанін, якога даставілі ў райбальніцу ў непрытомным стане: мужчыну адправіў у глыбокі накаўт яго знаёмы.

Увага! У перыяд з 19 па 25 мая на тэрыторыі раёна праводзяцца мерапрыемствы па прафілактыцы злачынстваў супраць жыцця і здароўя з боку раней судзімых асоб.

РАСК

Узбуджана 8 крымінальных спраў, у тым ліку па фактах: яўкі з павіннай раней судзімага асіпаўчаніна, што некалькі месяцаў назад украў мабільны тэлефон; крадзяжу 1.600 долараў ЗША з кватэры, куды невядомы злодзей-дамушнік патрапіў, падабраўшы ключ.

ДАI

Спынена 162 парушэнні правілаў руху, прыцягнута да адказнасці 84 парушальнікі хуткаснага рэжыму і 2 п’яныя вадзіцелі, адзін з якіх — паўторна на працягу года. Адбылося 4 нязначных ДТЗ.

РАНС

Складзены пратаколы: па фактах самавольнага высякання лесу — два, вывазцы драўніны без належных дакументаў і спробы браканьерскай здабычы рыбы.