РАУС

У перыяд 18 па 24 лістапада зарэгістравана па 2 крадзяжы, нанясення цялесных пашкоджанняў і парушэнні эканамічнага заканадаўства, 5 выпадкаў самагонаварэння. Раскрыты раней здзейснены крадзеж, вызначана месцазнаходжанне асобы, якая ўхілялася ад выплаты аліментаў.

Недалёка ад в. Брыцалавічы знойдзены астанкі знікшага ў снежні мінулага года 80-гадовага мужчыны.

19 чысла ў ЦРБ дастаўлена 39-гадовая жыхарка  в. Дрычын, якая пры невядомых пакуль абставінах атрымала пералом касцей звода чэрапа.

У ноч на 21 лістапада быў узламаны шклопакет у павільёне ГЦ «Рахмат» і ўкрадзена бытавая тэхніка агульным коштам 30 млн. руб. У той жа дзень двое работнікаў ААТ «АЗАА» кінулі ў вогнішча артылерыйскі снарад часоў вайны. Самавольны падрыў быў праведзены прыблізна ў 400 м ад п. Савецкі і нанёс значныя пашкоджанні прылягаючым дрэвам. «Сапёры-аматары» знайшлі боепрыпас калібрам як мінімум 105 мм яшчэ ў верасні.

22 лістапада на шашы Мінск-Гомель быў затрыманы грузавы аўтамабіль «Мерсэдэс-Бенц», які перавозіў таварна-матэрыяльныя каштоўнасці коштам каля 83 млн. руб. без належных дакументаў. Матэрыял накіраваны ў інспекцыю па падатках і зборах.

РАСК

Узбуджаны крымінальныя справы па фактах крадзяжу лекавых сродкаў, якія ўтрымліваюць апіяты, металічнага лому агульным коштам 150 тыс. руб., 3 індыкоў і нанясення цялесных пашкоджанняў.

Шматлікія нажавыя раненні атрымаў 17-гадовы асіпаўчанін падчас спрэчкі з 26-гадовым жыхаром   Мар’інай Горкі, раней судзімым за злачынствы, звязаныя з нанясеннем шкоды здароўю.

ДАI

Спынена 148 парушэнняў правілаў руху, прыцягнута да адказнасці 9 п’яных вадзіцеляў, 20 парушальнікаў хуткаснага рэжыму, 30 пешаходаў, якія не мелі святлоадбіваючых элементаў на адзенні. Адбылося 10 ДТЗ.

18 чысла каля 7 гадзін раніцы на шашы Мінск-Гомель каля в. Смык вадзіцель грузавога аўтамабіля «Мерсэдэс-Бенц» не справіўся з кіраваннем, з-за чаго машына выехала на раздзяляльную лінію і перакулілася. У выніку аварыі пасажыр — гаспадар машыны — патрапіў у ЦРБ з пераломам нагі, а значная частка грузу — разнастайнай свежай садавіны — разляцелася па праезнай частцы.

20 лістапада а восьмай гадзіне раніцы жанчына, якая перабягала вул. Юбілейную каля аўтазаправачнай станцыі, была збіта машынай і атрымала пералом рукі. Асноўнымі прычынамі ДТЗ можна лічыць адсутнасць на адзенні пацярпелай святлоадбіваючых элементаў і яе няўважлівасць пры пераходзе праезнай часткі.

24 чысла легкавік «Мерсэдэс Е280» на сустрэчнай паласе руху пры праездзе пуцеправода на вул. Сташкевіча «прыцёрся» бокам да службовай машыны РАУС, якая рушыла ў сустрэчным накірунку. У выніку ДТЗ міліцэйская «Ніва» атрымала механічныя пашкоджанні. Парушальнік — вадзіцель-прафесіянал — знаходзіўся ў стане алкагольнага ап’янення.

Увага! 29 лістапада праводзіцца адзіны дзень бяспекі руху «Пешаход — на пераход!». За гэты год з удзелам пешаходаў на дарогах раёна адбылося 9 ДТЗ (7 чалавек паранены і 2 загінула).

АУСТ

Складзены 72 адміністрацыйныя пратаколы, у тым ліку на 21 неадэкватнага пасажыра, якія былі ссаджаны з цягнікоў.

Узбуджана крымінальная справа па факце крадзяжу асабістай маёмасці.

IАЖіРС

Складзены пратаколы па выпадках утварэння несанкцыянаваных сметнікаў на юрыдычную і фізічную асобы, якія нанеслі навакольнаму асяроддзю ўрон на 11 і 12,5 базавых велічынь адпаведна.