РАУС

4 лютага ўзбуджана крымінальная справа па факце крадзяжу шляхам узлому капотаў акумулятараў з двух аўтамабіляў “ВАЗ”, якія стаялі каля аднаго з дамоў. 7 лютага з паўпрычэпа “МАЗ-9758” украдзены тры алюмініевыя барты, страты — 7 млн. рублёў.

9 чысла ў сваім доме  ў п. Ялізава без бачных прыкмет гвалтоўнай смерці знойдзены труп 45-гадовага гаспадара.

За тыдзень у жыхароў раёна было канфіскавана 453 літры брагі, у тым ліку 250 — 8 чысла. У “лідарах” вёскі Градзянка і Ясянец, п. Ялізава. Выдзеліліся і Каменічы: акрамя брагі, тут канфіскавана 42 літры яшчэ больш “цэннага” прадукту — самагону.

Увага! Крымінальна-выканаўчая інспекцыя паведамляе, што з 10 па 17 лютага на тэрыторыі горада і раёна праводзіцца спецыяльнае комплекснае мерапрыемства “Нагляд”.

РАСК

У перыяд з 3 па 9 лютага ўзбуджана 13 крымінальных спраў: за нанясенне цялесных пашкоджанняў — 4, рэалізацыю асабліва небяспечных псіхатропных і набыццё наркатычных рэчываў — па 1, пагрозу забойствам — 1, крадзеж — 6. Прычым землякі праявілі ў апошнім асаблівую разнастайнасць. Так, 3 лютага ў Верайцах непрыкметна “пазычылі” мабільнік, на наступны дзень у Ялізаве з дома “зніклі” таемным чынам прадукты харчавання коштам 72.590 рублёў.

4 чысла ўзбуджана крымінальная справа ў адносінах трох рабочых ААТ “Рыбгас “Свіслач”, якія тыднем раней увечары з сарціровачнага пункта свайго ж прадпрыемства шляхам падбору ключа спрабавалі “вылавіць” 40 кілаграмаў карпа.

ДАI

Спынена 147 парушэнняў правілаў руху, прыцягнута да адказнасці 80 парушальнікаў хуткаснага рэжыму, п’яны вадзіцель і 19 пешаходаў без святлоадбіваючых элементаў. Адбылося 4 ДТЗ, 1 пацярпелы шпіталізаваны.

9 чысла на вул. Iнтэрнацыянальнай аўтамабіль “ВАЗ-2106” наехаў на пешахода.

Увага! З 10 па 20 лютага праводзіцца комплекс мерапрыемстваў па папярэджванні ДТЗ з удзелам пешаходаў і іншых неабароненых удзельнікаў дарожнага руху.

АУСТ

Затрыманы 3 злачынцы, якія знаходзіліся ў вышуку. Складзена 84 адміністрацыйныя пратаколы. Суправоджана 50 цягнікоў, з якіх ссаджана 9 парушальнікаў парадку.

Спецізалятар

Ва ўстанову дастаўлена 27 грамадзян, сярод якіх — 3 жанчыны, 2 іншагароднія жыхары. 21 чалавек быў пакінуты для працверажэння. Асабліва “ўраджайным” на аматараў алкагольных напояў аказалася чысло 8: у выцвярэзнік у гэты дзень патрапіла 8 чалавек.

РАНС

На тэрыторыі раёна адбылося 3 пажары, адзін з якіх — 8 лютага па вул. Шамякіна. Пашкоджана перакрыццё і дах. Прычына пажару ўстанаўліваецца.

За парушэнне заканадаўства аб пажарнай бяспецы прыцягнуты да адміністрацыйнай адказнасці 1 кіраўнік і 19 домаўладальнікаў.

IАЖіРС

Складзены 4 пратаколы: 2 — за незаконную высечку лесу, столькі ж — за парушэнні ў вядзенні паляўнічай гаспадаркі.