РАУС

27 студзеня аддзелам барацьбы з эканамічнай злачыннасцю РАУС узбуджана крымінальная справа ў адносінах індывідуальнага прадпрымальніка Л., які 15.05. 2013 г. шляхам падману мясцовай жыхаркі завалодаў 3,5 млн. рублёў.

28 студзеня побліз в. Камарын спынены аўтамабіль “Мерседэс-Бенц” жыхара Светлагорска, які перавозіў вокны ПВХ і міжпакаёвыя дзверы з камплектуючымі без суправаджальных дакументаў на агульную суму 37.247.000 рублёў. Праводзіцца праверка.

У сваіх кватэрах знойдзены два трупы асіпаўчан: 31 студзеня — пенсіянеркі без яўных прыкмет гвалтоўнай смерці, на наступны дзень ужо ў муміфіцыраваным стане — 41-гадовага непрацуючага гр. А.

РАСК

У перыяд з 27 студзеня па 2 лютага ўзбуджана 10 крымінальных спраў, у тым ліку 4 — за рэалізацыю асабліва небяспечных псіхатропных рэчываў, 1 — за кіраванне транспартным сродкам вадзіцелем, які раней быў пазбаўлены правоў, астатнія — за крадзяжы. Асабліва танна ацаніў сваю свабоду і добрае імя гр. Я., які адкрыта, без прымянення насілля, украў у магазіне 4 бутэлькі гарэлкі, 3 пачкі цыгарэт, 2 палімерныя пакеты і 6 аднаразовых шкляначак. Але свята не ўдалося…

ДАI

Спынена 188 парушэнняў правілаў руху, прыцягнуты да адказнасці 121 парушальнік хуткаснага рэжыму, 1 п’яны вадзіцель і 24 пешаходы без святлоадбіваючых элементаў. Адбылося 2 дарожна-транспартныя здарэнні з матэрыяльнымі стратамі.

АУСТ

Складзена 89 адміністрацыйных пратаколаў, затрыманы 3 злачынцы, якія раней знаходзіліся ў вышуку. Канфіскавана 90 пар абутку без акцызных марак на суму 14 млн. і 200 літраў брагі.

Дэпартамент аховы

Спынена 14 правапарушэнняў, з якіх дробных крадзяжоў — 3, хуліганства — 1, выпадкаў парушэння антыалкагольнага заканадаўства — 3, правілаў дарожнага руху — 7.

Спецізалятар

Ва ўстанову дастаўлена 29 п’яных грамадзян, сярод якіх 2 жанчыны, размешчана для працверажэння 24 чалавекі, у тым ліку 4 — іншагароднія жыхары. Больш за ўсё аматараў напояў з градусамі прыведзена патрульна-паставой службай — 12.

РАНС

Адбыліся 2 выпадкі ўзгаранняў у райцэнтры.

28 студзеня пайшла агнём гаспадарчая пабудова па вул. Ленінскай, а 29 чысла — навес з піламатэрыяламі ў зав. Завадскім. Прычына першага — парушэнне правілаў устройства пячэй і ацяпляльных прыбораў; чаму ўзнік другі пажар, пакуль высвятляецца.

IАЖіРС

Складзены 1 пратакол за незаконнае паляванне — выкарыстанне 11 пастак на пушнога звера (куніцу).