Супрацоўнікамі АДАІ РАУС на мінулым тыдні папярэджана 15 правапарушэнняў, да адказнасці прыцягнута 5 “бяспраўнікаў”. Зарэгістравана 6 ДТЗ, у якіх пацярпела 3 чалавекі: 15 студзеня каля 8 гадзін раніцы на вул. Сумчанкі аўтобус наехаў на пенсіянерку, якая перасякала дарогу па-за пешаходным пераходам; 16 чысла на скрыжаванні вуліц Плошча Базарная і Асіпенкі 12-гадовы вучань СШ № 3 выбег на праезную частку і трапіў пад колы аўтамабіля; шпіталізавана і вадзіцель, якая 17 студзеня на 115 км шашы Мінск-Гомель не справілася з кіраваннем “Міцубісі” і сутыкнулася з аўтацягніком.

Аддзелам Дэпартамента аховы да адміністрацыйнай адказнасці прыцягнута 3 асобы, якія здзейснілі дробныя крадзяжы, 1 — іншае правапарушэнне.

У РАНС паведамілі, што 18 чысла адбыўся пажар у фарбавальнай камеры цэха № 1 завода транспартнага машынабудавання: агнём пашкоджаны 4 рухавікі і 12 свяцільняў, электраправодка, частка сцен і даху; знішчаны 34 фільтры сістэмы вентыляцыі.

ІАЖіРС складзена 3 адміністрацыйныя пратаколы за парушэнне правілаў рыбалоўства; па матэрыялах інспекцыі ўзбуджаны 2 крымінальныя справы па фактах незаконнай транспарціроўкі рыбы і паўторнага незаконнага рыбалоўства.