На мінулым тыдні пракурор Магілёўскай вобласці Аляксандр Чадзюк і старшыня Камітэта дзяржкантролю Алег Садоўскі правялі ў Вяззеўскім сельвыканкаме выязны асабісты прыём грамадзян і “прамую тэлефонную лінію”. Звярнуцца да іх з хвалюючымі пытаннямі і атрымаць кампетэнтны адказ можна было на працягу гадзіны. Тэлефонных званкоў зафіксавана небагата, а на прыём прыйшлі два грамадзяніны: жанчына высветліла нюансы наконт падзелу маёмасці пры скасаванні шлюбу, а жыхар райцэнтра — па спрэчных, з яго пункту гледжання, момантах у вызначэнні межаў участка.

Тады ж прайшло і пасяджэнне камісіі грамадскага пункта аховы парадку, удзел у якім разам з кіраўніцтвам праваахоўных структур Магілёўшчыны прынялі пракурор раёна Аляксандр Канецкі, кіраўнік спраў райвыканкама Алег Кулакоўскі, першы намеснік і намеснік начальніка РАУС Сяргей Багдановіч і Рустам Хамдамаў, старшыня ААТ “Авангард-Ніва” Сяргей Сідарэнка і другія адказныя работнікі. Асноўная ўвага была нададзена пытанням прафілактыкі правапарушэнняў сярод людзей: гутарка вялася індывідуальна з кожным з 5 запрошаных, якія і атрымалі канкрэтныя тлумачэнні-парады.

Абмеркаваўшы, напрыклад, жыццёвую сітуацыю і становішча сем’яў, камісія пад началам старшыні сельвыканкама Iвана Вярыгі вырашыла хадайнічаць перад адміністрацыяй ААТ “Авангард-Ніва” аб працаўладкаванні трох чалавек у сельгаспрадпрыемства, аднаму з іх месца работы прапануюць пры ўмове праходжання лячэння ад алкагольнай залежнасці; шматдзетнай маці параілі значна больш увагі надаваць выхаванню дзецей і прапанавалі садзейнічанне ў арганізацыі іх летняга вольнага часу.

Пракурор і старшыня КДК вобласці падкрэслілі, што, дзякуючы ўсебаковай падтрымцы дзяржавы, перспектывы годнага жыцця ёсць у кожнага — варта толькі змяніць яго лад. У лепшы, натуральна, бок.