Знаёмцеся: Вячаслаў Яшкін

Знаёмцеся:

начальнік інспекцыі па справах непаўналетніх Асіповіцкага РАУС Вячаслаў Яшкін

Прафесійную дзейнасць пачынаў на педагагічнай ніве: пасля заканчэння Беларускай дзяржаўнай акадэміі фізічнай культуры 2 гады працаваў у Лапіцкай школе. У 2003 годзе прыйшоў на службу ў РАУС: інспектар IСН, старшы інспектар групы кадраў, з 2006 года, скончыўшы факультэт аператыўна-вышуковай дзейнасці Акадэміі МУС, служыў на розных пасадах у аддзеле крымінальнага вышуку.

11 сакавіка Вячаслаў Сямёнавіч прызначаны на пасаду начальніка інспекцыі па справах непаўналетніх:

— Задача IСН застаецца нязменнай — праца з дзецьмі і падлеткамі, якія парушылі закон ці часам знаходзяцца на мяжы дазволенага. Мы павінны зберагчы іх ад учынкаў, аб якіх горка прыйдзецца пашкадаваць у будучыні, тым жа, хто ўжо спатыкнуўся, дапамагаем  устаць на шлях выпраўлення і знайсці правільную дарогу ў дарослае жыццё. Сёння на ўліку ў IСН знаходзяцца 84 непаўналетнія, 3 з іх з так званай асаблівай катэгорыі — ужо судзімыя. Мэта работы інспекцыі не ў тым, каб, выявіўшы злачынства, адразу ж адправіць падлетка за краты, а ў правядзенні растлумачальнай і прафілактычнай работы з дзецьмі, у якую актыўна ўключаны навучальныя ўстановы, спецыялісты аддзела адукацыі, КСН і другія.

Каб працаваць з «цяжкімі» падлеткамі, супрацоўнік інспекцыі павінен быць не толькі міліцыянерам, але і выхавальнікам, псіхолагам, дарадчыкам. Яшкіну тут дапамагае вопыт работы з дзецьмі, які ў свой час атрымаў у школе, інспекцыі, ва ўласнай сям’і. Увесь вольны час Вячаслаў з жонкай Святланай праводзяць з сынамі — 16-гадовым студэнтам Алегам і 12-гадовым гімназістам Аляксеем. Ва ўсіх — агульныя інтарэсы: рыбалка, катанне на каньках, захапленне лёгкай атлетыкай і хакеем.