З аптымізмам у будучыню

Напярэдадні свайго прафесійнага свята гутарым з падпалкоўнікам юстыцыі Сяргеем Шчыгловым, які на час водпуску выконвае абавязкі начальніка Асіповіцкага раённага аддзела Следчага камітэта Рэспублікі Беларусь:

— 12 верасня 2011 года Кіраўніком дзяржавы падпісаны Указ «Аб стварэнні Следчага камітэта Рэспублікі Беларусь». У склад новага праваахоўнага органа ўвайшлі следчыя пракуратуры, Міністэрства ўнутраных спраў, Дэпартамента фінансавых расследаванняў. Следчы камітэт Рэспублікі Беларусь пачаў функцыянаваць з 1 студзеня 2012. Скажу, што гэта адзіная і цэнтралізаваная сістэма дзяржаўных праваахоўных органаў, якія з’яўляюцца органамі папярэдняга следства і ажыццяўляюць паўнамоцтвы ў сферы дасудовай крымінальнай вытворчасці. Спачатку, разам з паўсядзённай працай, вырашаліся і арганізацыйныя пытанні дзейнасці Камітэта.

Па выніках працы за мінулыя 2 гады неаднаразова давалася ацэнка дзейнасці Следчага камітэта, і рашэнне аб яго стварэнні прызнана мэтазгодным і своечасовым. За 8 месяцаў бягучага года на тэрыторыі Асіповіцкага раёна ў параўнанні з аналагічным перыядам 2013 года назіраецца рост зарэгістраваных злачынстваў, у сувязі з чым работы ў Асіповіцкім раённым аддзеле Следчага камітэта Рэспублікі Беларусь не становіцца менш, а наадварот — аб спакойнай працы застаецца толькі марыць. За названы перыяд у вытворчасці Асіповіцкага РАСК знаходзілася 324 крымінальныя справы, з якіх перададзена ў суд 281 у дачыненні 329 абвінавачаных.

Папярэдняе расследаванне па крымінальных справах вядзецца следчымі Асіповіцкага РАСК. Калектыў у асноўным складаецца з маладых супрацоўнікаў, якія прыйшлі ў Следчы камітэт пасля заканчэння грамадзянскіх ВНУ, а таксама пасля заканчэння Акадэміі МУС Рэспублікі Беларусь. Хачу звярнуцца да юнакаў і дзяўчат: калі вы прынцыповыя, сумленныя, настойлівыя ў дасягненні мэты, камунікабельныя, валодаеце аналітычным складам мыслення, то можаце стаць кандыдатам для паступлення на следча-экспертны факультэт Акадэміі МУС Рэспублікі Беларусь, пасля заканчэння якога прысвойваецца кваліфікацыя «юрыст» і спецыяльнае званне «лейтэнант юстыцыі». Калі зацікавіліся, тэлефануйце па нумарах 60-965, 65-197 або 65-120. А калегам у Дзень стварэння Следчага камітэта хацелася б пажадаць сямейнага дабрабыту, здароўя, поспехаў у нялёгкай, але патрэбнай працы.

Гутарыў Георгій АЛЕЙНІКАЎ.