Добраахвотная дружына

Якія абавязкі выконвае дружыннік, Надзея Карнеенка дакладна не ведала, пакуль не сутыкнулася са справай аховы правапарадку

Калі ў вагонным дэпо, дзе яна працуе аператарам пункта абслугоўвання вагонаў, прапанавалі паспрабаваць сябе ў гэтай грамадскай рабоце, згадзілася: новы вопыт ніколі не лішні. І не шкадуе, бо за сем гадоў шмат пабачыла і пераканалася ў неабходнасці работы дружыннікаў. Напрыклад, не раз сутыкалася з людзьмі ў стане алкагольнага і наркатычнага ап’янення, была сведкай іх затрымання, дапамагала прадстаўнікам праваахоўных органаў арыштоўваць наркагандляроў, тым самым прыпыняючы распаўсюджанне небяспечнай атруты. Здаралася і дапамагаць людзям, якія трапілі ў бяду. Так, аднойчы прахожы згубіў прытомнасць, упаў і разбіў галаву. Давялося дачакацца хуткай дапамогі, каб пераканацца, што чалавек у надзейных руках.

Але, на шчасце, падобныя сітуацыі здараюцца нячаста, а ў асноўным членам добраахвотнай дружыны даводзіцца нагадваць насельніцтву правілы паводзін у грамадскіх месцах: курыць толькі ў вызначаных зонах, спіртныя напоі на вакзале не распіваць, не парушаць спакой іншых, пераходзіць пуці праз мост, а не там, дзе ўздумаецца… Калі-нікалі і згубленыя рэчы вяртаць уладальнікам даводзілася.

А яшчэ дружыннікі суправаджаюць цягнікі па розных кірунках, у час паездак сочаць за тым, каб пасажыры ў вагонах адчувалі сябе бяспечна і камфортна.

Дзеці ганарацца сваёй матуляй, заўсёды цікавяцца, як прайшло яе чарговае дзяжурства… А Надзея Мікалаеўна, як камандзір добраахвотнай дружыны, ведае: калі на пасту праваахоўнікі і іх надзейныя памочнікі, то на чыгуначных аб’ектах усё ў парадку!