Хоць траскучых маразоў, пасля якіх вадаёмы прамярзаюць на значную глыбіню, яшчэ не было, першыя спробы выхаду на лёд аматары рыбалкі ўжо ажыццяўляюць. Як адзначае старшыня раённай арганізацыі РДГА “Беларускае рэспубліканскае таварыства ратавання на вадзе” Аляксандр Сушчынскі, на мінулым тыдні таўшчыня лёдавага покрыва на вадаёмах раёна была каля 8-10 сантыметраў. Але пасля ветраных і дажджлівых выхадных лёд значна растаяў: зараз — не больш за 3 см, а гэта ўжо небяспечна. I ў краіне ўжо адбылося каля дзясятка няшчасных выпадкаў па віне бяспечных “лёдапраходцаў”…

Не забывайцеся, што выхад на лёд забаронены падчас ледастава, пакуль таўшчыня покрыва не дасягне 7 см, а таксама ў перыяд таяння і разбурэння. Правяраць трываласць лёду ўдарамі ног нельга — толькі колам або пяшнёй. Падчас падлёднай рыбалкі не прабівайце шмат лунак на малой плошчы, не збірайцеся вялікімі групамі, не выходзьце на лёд у завіруху або цёмначы. Беражыце сябе!