РАУС

У перыяд з 11 па 17 ліпеня адбылося 11
супрацьпраўных учынкаў: крадзяжы — 9, выраб самагону — 2. Узбуджана 6
крымінальных спраў.

 12 чысла
ў штучным вадаёме каля вёскі Малая Грава патануў 45-гадовы мясцовы жыхар.
Абставіны яго смерці высвятляюцца.

 15 ліпеня
на будынак бізнес-цэнтра на вуліцы Рымы Кунько, 2 (былая хімчыстка) быў
здзейснены сапраўдны налёт, падчас якога з памяшканняў, дзе размяшчаецца
маёмасць IП “Струпінскі Ю.С.”, студыі “R-53” і магазіна “Цэтлік”, зніклі газавы
ацяпляльны кацёл, офісная аргтэхніка, цяслярны і слесарскі інструмент на
агульную суму каля 30 млн. руб.

 Сярод
узбуджаных крымінальных спраў дзве тычацца нядаўніх уцекачоў з ізалятара
часовага ўтрымання — Дзмітрыя Шаржановіча і Анатоля Гара-дзецкага. Першы
абвінавачваецца ў крадзяжы халоднай зброі — паляўнічага нажа — у жыхара вёскі
Дварок, другі — у спробе прысваення рэчаў, якія належаць гаспадару дачнага дома
ў пасёлку Сасновы.

 У ноч з
14 на 15 ліпеня ў ЦРБ дастаўлены непрацуючы 42-гадовы асіпаўчанін са шматлікімі
траўмамі твару і галавы, ударам галаўнога мозгу. Пацярпелы, які на момант
аказання медыцынскай дапамогі знаходзіўся ў стане алкагольнага ап’янення, не
пажадаў тлумачыць паходжанне сваіх цялесных пашкоджанняў і адмовіўся падаваць
заяву ў міліцыю.

ДАI

Спынена 108 парушэнняў правілаў дарожнага руху,
прыцягнута да адказнасці 6 п’яных вадзіцеляў. Адбылося 15 ДТЗ.

16 чысла вадзіцель аўтамабіля ВАЗ-2102 на 111 км шашы Мінск-Гомель ва
ўмовах моцнага дажджу і дрэннай бачнасці страціў кантроль над машынай, у выніку
чаго яна выехала на сустрэчную паласу руху і пасля бакавога сутыкнення з
“Сітраенам С-5”
з’ехала ў кювет і перакулілася. Гаспадар разбітых ушчэнт “Жыгулёў” з
пагражаючым жыццю пераломам сцягна і мноствам іншых цялесных пашкоджанняў
дастаўлены ў райбальніцу.

На наступны дзень жыхар вёскі Каўгары, кіруючы
ўласнай “Аўдзі”, на закругленні дарогі Каўгары-Канцы-Краі не справіўся з
кіраваннем, з’ехаў у кювет і перакуліўся. Вынікам аварыі для 32-гадовага
мужчыны, які не карыстаўся рамянём бяспекі, сталі пераломы рэбраў і рэзаныя
раны твару. А вось пасажыр іншамаркі ехаў прышпіленым, таму цялесных
пашкоджанняў не атрымаў.

Надвячоркам 17 ліпеня на шашы Асіповічы-Свіслач
каля вёскі Вяззе легкавы аўтамабіль урэзаўся ў статак кароў, якія пераходзілі
дарожнае палатно. У выніку сутыкнення 5 жывёл загінула. Вядзецца праверка
абставін незвычайнага ДТЗ.

АДАI нагадвае, што правесці рэгістрацыю мапедаў
па спро-шчанай працэдуры — непасрэдна ў Асіповічах, без дастаўкі транспартных
сродкаў у Бабруйскае МРЭА — можна да 1 жніўня. Рэгістрацыя вядзецца па
наступным графіку: аўторак, чацвер — з 14.00 да 17.00, серада — з 8.00 да
12.00.

АУСТ

Затрымана 48 правапарушальнікаў, узбуджана 3
крымінальныя справы па фактах крадзяжоў, затрыманы злачынца, які знаходзіўся ў
вышуку. Канфіскавана 3,5 л
кантрабанднага алкаголю.

У зоне адказнасці АУСТ і стралкова-пажарнай
каманды на станцыі Асіповічы адбыўся выпадак суіцыду: 32-гадовая жанчына легла
на рэйкі перад таварным цягніком. Трагедыя адбылася ў межах горада, паблізу ад
пераезду на вуліцы Крыловіча.

Дэпартамент аховы

Перасечана 4 выпадкі распіцця алкагольных напояў
у месцах грамадскага карыстання, 5 дробных правапарушэнняў, 1 факт
самагонаварэння.

15 чысла затрыманы раней судзімы грамадзянін,
які амаль адразу пасля вяртання дадому з месца адбыцця пакарання за крадзеж,
паспрабаваў здзейсніць угон аўтамабіля ВАЗ-2101.

IАЖіРС

Складзена 3 пратаколы па фактах парушэння
правілаў лесакарыстання, канфіскавана 1 браканьерская сетка, у якой
знаходзілася 7 кг
рыбы.