Затрыманне апошняга злачынцы, што самавольна
пакінуў камеру ізалятара часовага ўтрымання РАУС, адбылося роўна праз 14 дзён і
8 гадзін з моманту ўцёкаў. Сёння спецыяльна для чытачоў “раёнкі” аб
падрабязнасцях міліцэйскай спецаперацыі па вышуку зладзеяў-уцекачоў расказвае
першы намеснік начальніка райаддзела ўнутраных спраў Андрэй Гаварака:

— Два тыдні каля 300 супрацоўнікаў міліцыі —
Асіповіцкаму РАУС дапамагалі калегі з прылягаючых раёнаў, падраздзяленні
ўнутраных войск і супрацоўнікі АУСТ і Магілёўскага УУС — вялі метадычнае
абследаванне ўсіх магчымых адрасоў, дзе мог хавацца ўцякач, і наглядалі за
дарогамі, населенымі пунктамі і ляснымі масівамі на верагодных накірунках яго
перасоўвання за межы раёна. Усе асобы, якія маглі аказаць Шаржановічу дапамогу,
былі ўзяты пад кантроль, а той без падтрымкі “сяброў” не рызыкнуў адыходзіць
далёка ад Асіповіч. Першапачаткова хаваўся ў лесе, потым перабраўся ў дачны
масіў каля вёскі Дварок (Пратасевічы 2). Там знайшоў пусты дом і зрабіў
сховішча на гарышчы. На мінулых выхадных, калі прыехалі гаспадары сядзібы,
Шаржановіч зноў збег у лес.

Каля 22.00 гадзін у нядзелю пайшоў у горад —
відаць, меў намер усё ж звязацца з кімсьці са знаёмых. Выпадковыя сведкі
заўважылі падазронага мужчыну на паўднёвай ускраіне Асіповіч і паведамілі ў
РАУС.

Аперацыя па затрыманні Шаржановіча пачалася
хутка, аднак была безвыніковай: злачынца ўмела збіў сабаку са следу і знік у
цемры. У панядзелак ён паспрабаваў зноў схавацца на дваркоўскіх дачах, дзе быў
заўважаны мясцовымі жыхарамі.

Калі да месца знаходжання ўцекача прыехалі
супрацоўнікі міліцыі, той пабег у лес, аднак яго ўжо чакала засада. Пры
затрыманні ён не супраціўляўся.

— Ці растлумачыў Шаржановіч матывы ўцёкаў, што
ён збіраўся рабіць на свабодзе, чым харчаваўся?

— Фізічны і псіхалагічны стан на момант
затрымання былі вельмі дрэнныя: увесь гэты час ён амаль нічога не еў і вельмі
мала спаў, а пагоня ў нядзелю падарвала яго апошнія сілы. Навошта ўцякаў — сам
не ведае. Як і Гарадзецкі, імпульсіўна скарыстаўся пэўным збегам абставін.
Першапачаткова разлічваў выбрацца за межы краіны, аднак калі зразумеў, што гэта
немагчыма, вырашыў “залегчы” і чакаць, пакуль знізіцца актыўнасць пошукаў. Пры
затрыманні ў асабістых рэчах Шаржановіча былі знойдзены маленькі пакецік
арэшкаў, некалькі ўпаковак жуек, стэрыльны бінт. Дзе ён узяў гэтыя прадметы,
пакуль невядома.

Увогуле ж розніца ў паводзінах паміж абодвума
ўцекачамі вялізная. Гара-дзецкі адразу пачаў пакідаць сляды-падказкі, а
Шаржановіч да апошняга моманту праяўляў асцярожнасць і хітрасць. Шчыра кажучы,
мы не выключаем, што падчас уцёкаў ён па-спеў здзейсніць яшчэ якое-небудзь
злачынства.

— Пошукі ўцекачоў запатрабавалі вялікага
напружання ад усіх работнікаў 
асіповіцкай міліцыі, аднак, мяркуючы па аператыўных зводках, падчас іх
правя-дзення ў раёне адзначалася рэзкае змяншэнне колькасці крыміналу…

— У ходзе спецаперацыі было складзена шмат
адмі-ністрацыйных пратаколаў на асоб, якія, не патрапіўшы своечасова ў поле
зроку міліцыі, маглі б здзейсніць сур’ёзныя супраць-праўныя ўчынкі. Так што — у
пэўным сэнсе дзякуючы злачынцам-уцекачам — удалося правесці значную
прафілактычную работу па ўсяму раёну і ўмацаваць сувязі з законапаслухмянымі
грамадзянамі. З дапамогай якіх, прынамсі, Гарадзецкі з Шаржановічам і былі
затрыманы.

— А якія высновы былі зроблены з гэтых уцёкаў
для рэарганізацыі нагляду за зняволенымі ў камерах ізалятара часовага
утрымання?

— Усе абставіны ўзгаданага інцыдэнту яшчэ не
ўстаноўлены, таму аб канчатковых высновах казаць пакуль нельга. Аднак тое, што
больш самавольна выйсці з ІЧУ не здолее ніхто, магу гарантаваць.

Гутарыў Зміцер КАЛЯДА.