Выбух у маскоўскім аэрапорце “Дамадзедава” не
мае, здавалася б, ніякага дачынення да беларускай чыгункі, аднак на працягу ўжо
амаль двух тыдняў супрацоўнікі нашай транспартнай міліцыі нясуць службу ва
ўзмоцненым рэжыме: суправаджаецца намнога больш, чым звычайна, цягнікоў,
правяраюцца дакументы ва ўсіх падазроных пасажыраў, з дапамогай
металадэтэктараў даглядаюцца вялікія сумкі і чамаданы…

Не ўсе пасажыры ўспрымаюць дзеянні міліцыі з
разуменнем, але выклікаецца адмоўная рэакцыя выключна недаацэнкай беларускім
грамадствам сур’ёзнасці сітуацыі.

Па інфармацыі Асіповіцкага АУСТ, адной з
галоўных мэт увядзення жорсткіх мер засцярогі з’яўляецца дапамога расійскім
калегам у пошуках удзельнікаў групы ваххабітаў-ісламістаў “Нагайскі джамаат”,
якія, верагодна, маюць дачыненне да крывавага тэрарыстычнага акта. Не
выключана, што галоўны фігурант міжнароднага вышуку — 33-гадовы жыхар
Стаўрапаля Віталь Раздабудзька, ведаючы пра інтарэс праваахоўных структур да
сваёй асобы, уцёк з тэрыторыі Расіі ў адну з суседніх краін. А ўсім вядома, што
менавіта беларуска-расійская мяжа з’яўляецца найбольш “празрыстай” на ўсёй
постсавецкай прасторы…

У зоне абслугоўвання Асіповіцкага аддзела
ўнутраных спраў на транспарце за гэты перыяд нічога, што магло б паспрыяць
расследаванню чарговага тэракта ў РФ, не было адзначана. Але гэта не азначае,
што нашы міліцыянеры-транспартнікі дарэмна напружваюць свае сілы.