Дырэктар ААТ “Перасоўная механізаваная калона № 95 “Вадбуд” Людміла Долгая

Нарадзілася ў 1983 годзе ў Асіповічах. Пасля заканчэння СШ № 5 паступіла на факультэт меліярацыі і воднай гаспадаркі Горацкай сельгасакадэміі.

Яе першым рабочым месцам стала асіповіцкая ПМК № 95. Пачынала інжынерам-каштарыснікам у планавым аддзеле. Затым прызначалася начальнікам падсобнай вытворчасці, намес-нікам па будаўніцтве. З 2012 па 2023 гг. працавала ў прыватных структурах. Летам бягучага года вярнулася ў ПМК № 95 “Вадбуд” у якасці кіраўніка.

Работа ў меліярацыі і менавіта ў дадзеным прадпрыемстве для Людмілы свайго роду фамільная справа: шмат гадоў узначальваў перасоўную механізаваную калону яе тата Канстанцін Долгі. Ён і зараз можа даць нямала слушных парад дачцэ.

На новай пасадзе Людміла Канстанцінаўна плануе ў першую чаргу абнавіць транспартны парк. Ужо ўзялі ў лізінг новыя экскаватар і трал, на чарзе бульдозер. Наперадзе — рэалізацыя рэспубліканскай праграмы па меліярацыі асушаных зямель для ўвядзенне іх у далейшым у сельскагаспадарчы абарот. Належыць і калектыў папоўніць новымі свежымі сіламі. Словам, планаў шмат.

А вольны ад работы час жанчына бавіць з дачкой Златай, якая наведвае дзіцячы сад № 5 “Маячок”. Разам з дзяўчынкай любяць не толькі маляваць,  чытаць казкі ды сабіраць пазлы, але і хадзіць на рыбалку. Дарэчы, вудзіць атрымліваецца добра ў абедзвюх.