Жыхароў аграгарадка Ясень абслугоўвае магазін Глускага адасобленага структурнага падраздзялення Клічаўскага райста, астатнія 13 населеных пунктаў, размешчаных на тэрыторыі Ясеньскага сельсавета, забяспечваюць прадуктамі аўталаўкі.

У адзіным гандлёвым аб’екце гэтага адміністрацыйнага раёна заўсёды шматлюдна. Прадавец Таццяна Калеснікава працуе ў краме чатыры гады. Паток пакупнікоў ніколькі не палохае яе, бо папярэдні вопыт работы інжынерам па ахове працы сельгаспрадпрыемства, мастацкім кіраўніком установы культуры і паштальёнам прызвычаіў да стасункаў з людзьмі. Таццяна Уладзіміраўна ў аднолькавай меры ўмее знайсці падыход і да малых, і да дарослых, а таксама людзей паважанага ўзросту: “З дзецьмі размаўляем на роўных, хіба ж можна з імі абысціся без усмешкі? Яны такія непасрэдныя, вельмі іх люблю”. І пакупнікі адказваюць узаемнасцю, у чым пераканаліся ў час размовы. Пацікавіўшыся ў прадаўца асартыментам тавараў, пачулі ад наведвальнікаў: “У нашай цёці Тані ёсць усё!”, “Заўсёды сустракае нас у добрым настроі, радуецца кожнаму пакупніку, і наогул каманда ў яе цудоўная”.

А яе калектыў — сапраўды каманда. Разам з грузчыкам Віталіем Калеснікавым і прыбіральшчыцай Аленай Кавальчук прымаюць тавар, выкладваюць яго, наводзяць парадак на прылягаючай тэрыторыі, адказваюць на пытанні пакупнікоў. Тавар жа прыбывае што-дзённа: машыны з розных прадпрыемстваў дастаўляюць сваю прадукцыю стабільна.

Адметна, што з 30 чэрвеня магазін разам з іншымі гандлёвымі аб’ектамі Глускага райста ўвайшоў у склад Глускага АСП Клічаўскага райста. У яго рабоце быццам бы нічога і не змянілася, чаго не скажаш пра асартымент тавараў: хлебабулачныя вырабы глускай вытворчасці змянілі клічаўскія батоны і боханы.

— А ведаеце, мы неяк хутка прызвычаіліся і да новай прадукцыі, — разважае мясцовая жыхарка Вольга Снігір. — Маёй сям’і падабаюцца і хлеб, і здоба. Шмат пячэння, пірожных прывозяць. Усё свежае і смачнае.

Булкі, рулеты, кексы і на самой справе пульхныя, пахучыя, з рознымі напаўняльнікамі. Нездарма да іх цягнуцца юныя пакупнікі, якіх у магазін завітала адразу некалькі. Малыя спрактыкавана накіроўваюцца да халадзільніка з марожаным і бутэлек ліманаду — якое ж лета без гэтых ласункаў! А дарослыя набіраюць у карзіны мясныя і малочныя тавары, якіх тут таксама дастаткова.

— Праз дзень прывозяць малочку “Бабушкиной крынки”, — тлумачыць Таццяна. — А кожную сераду дастаўляецца прадукцыя гандлёвай маркі “Савушкин продукт”. Усё робім для таго, каб прадставіць як мага больш шырокі асартымент малочных прадуктаў. Мясная прадукцыя таксама завозіцца рэгулярна — Магілёўскага, Бабруйскага, Брэсцкага, Слонімскага мясакамбінатаў.

Безумоўна, і без садавіны-агародніны ніяк не абысціся! Магазін прапаноўвае не толькі прывычныя бульбу, моркву і цыбулю, але і кавуны, дыні, лімоны, іншыя карысныя прадукты.

А паток пакупнікоў не збаўляецца. У памяшканне заходзяць усё новыя людзі, якія ахвотна ўступаюць у дыялог.

— Мы бабруйчане з дачнага пасёлка, — тлумачыць Наталля Астравухава. — Прайшлі пяць кіламетраў, каб атаварыцца. Магазін гэты нам падабаецца, бываем тут часта. Абслугоўванне на вышэйшым узроўні!

Падобныя водгукі чулі і ад іншых пакупнікоў. Ці гэта не найлепшая адзнака работы гандлёвага аб’екта?