З’яўленне непатрэбных будынкаў можна лічыць нормай. Населены пункт — свайго роду жывы арганізм, і яму ўласцівы ўнутраныя перамены, у тым ліку адміранне непатрэбных частак.

Вось толькі існуе праблема. У адрозненне ад мёртвай арганікі, неэксплуатуемыя капітальныя пабудовы могуць стаяць на зямлі дзясяткі, сотні і нават тысячы гадоў — пакуль не разбурацца канчаткова альбо не дачакаюцца статуса ахоўваемага аб’екта гістарычнай спадчыны. Для якога-небудзь рымскага Калізея ці ўмацаванняў Бабруйскай крэпасці гэта плюс. А вось для асіповіцкіх аналагаў хутчэй мінус. Не без важкіх жа прычын яны так доўга знаходзяцца ў стане, які ёмка перадае класічная двухсэнсоўнасць “разбурыць нельга прадаць”.

Для якіх пабудоў у гэтым прысудзе пастаўлена коска, жадаючыя могуць даведацца на сайце райвыканкама osipovichi.gov.by/ru/auction-ru. Там прыведзены пералік нерухомай маёмасці, якую можна бясплатна атрымаць пад рэалізацыю інвестпраекта, набыць на аўкцыёне ці за сімвалічны кошт у адну базавую велічыню, узяць у арэнду. Іх даволі многа, таму ўзгадаем галоўныя: комплекс будынкаў былой чыгуначнай бальніцы, корпус дзіцячага аддзялення ЦРБ.

А што тычыцца карпусоў недабудаванай бальніцы на вуліцы Сташкевіча, казарм былога ваеннага гарадка ў мікрараёне вуліцы Чарняхоўскага і шэрагу іншых, менш цікавых для асіпаўчан аб’ектаў, то іх перспектывы хацелася б удакладніць. Раёнка звяртаецца за каментарыем да кампетэнтных спецыялістаў і ў хуткім часе пазнаёміць з іх адказамі чытачоў. Як кажуць тэлевізіёншчыкі, не пераключайцеся.