Пасля рэарганізацыі, якая прайшла ў ДУКВП “Водаканал” два гады таму, кардынальныя змены адбыліся і ў рабоце яго лабараторыі.

І не толькі ў назве гэта адлюстравалася. Лабараторыя кантролю якасці сцёкавых, прыродных і пітных вод Асіповіцкага аддзялення філіяла “Бабруйскводаканал” УВКП ВКГ “Магілёўводаканал” цяпер кантралюе стан вады не толькі Асіповіччыны. У сферы яе назіранняў знаходзяцца сцёкавыя воды гарадскога пасёлка Глуск, а таксама пітной вады Глускага і Клічаўскага раёнаў. А таму аб’ём работы пры нязменным штаце значна павялічыўся.

Лабараторыя акрэдытавана Беларускім дзяржаўным цэнтрам акрэдытацыі ў 2005 г. Першапачаткова яна вызначала якасць толькі сцёкавых вод, пазней у ёй адкрылі бакаддзел, і, адпаведна, функцыянал пашырыўся. Сталі дастаўляць на аналіз пітную ваду, якая ацэньваецца як па фізічных, так і хімічных і радыяцыйных уласцівасцях.

Зараз спецыялісты лабараторыі штомесячна бяруць 600 проб вады, стан якой вызначаюць па розных паказчыках — ад 7 да 28.

Адбор вады вядуць самастойна, што прадугледжвае пастаянныя камандзіроўкі. І калі адборшчыцы дастаўляюць чарговую партыю, пачынаецца работа ў аўральным рэжыме. А сцёкавыя воды ў нашым райцэнтры бяруцца штодзённа па ўсім ланцужку гарадскіх збудаванняў.

Загадчык лабараторыі Наталля Астаповіч расказала, што якасць пітной вады ў нашым раёне адпавядае нормам па ўсіх паказчыках, акрамя ўтрымання жалеза і мутнасці. Напрыклад, самыя апошнія аналізы паказалі, што ў 19 населеных пунктах Асіповіччыны гэтыя паказчыкі вышэй дапушчальных. Калі такое назіраецца, работнікі мясцовага аддзялення філіяла “Бабруйскводаканал” прамываюць сеткі на праблемным участку. Наталля Уладзіміраўна з задавальненнем канстатуе: “Узвядзенне станцый абезжалезвання адназначна вырашае праблему павышанага ўтрымання жалеза. Зараз у нас працуе адна станцыя ў горадзе і дзесяць на раёне. Вада, якая праходзіць праз іх, адрозніваецца ад іншай. Хутка ў райцэнтры з’явіцца другая станцыя, якую ўсе чакаюць. Так што з жалезам у водаправодзе будзе пакончана”.

Усе памяшканні лабараторыі напоўнены прабіркамі, колбамі. Тут разам з кіраўніком чаруюць лабаранты хіміка-бактэрыялагічнага і фізіка-хімічнага аналізу Таццяна Кашкурава, Алена Майлычка, Алена Макаранка, Алеся Епіхава, Ірына Васільчанка, інжынер-хімік Аксана Пратапопава, пробаадборшчыкі Аліна Сямко і Ганна Сакалоўская. Менавіта яны стаяць на варце якасці жыццёва неабходнай вадкасці, якую землякі штодзённа ўжываюць.