• У аддзяленні сацыяльнай рэабілітацыі, абілітацыі інвалідаў і дзённага знаходжання для грамадзян пажылога ўзросту РЦСАН сацыяльныя паслугі атрымліваюць 68 пенсіянераў. З іх 45 чалавек наведваюць заняткі па падтрыманні рухомай актыўнасці ў валанцёрскім гуртку “Здравушка”, 27 — гурток камп’ютарнай граматнасці “Эрудыт”, дзе вучацца працаваць на камп’ютары, карыстацца планшэтам, смартфонам, ноўтбукам. А 17 чалавек, якія займаюцца ў гуртку “Арт-тэрапія”, асвойваюць роспіс па тканіне, работу з бісерам і іншыя тэхнікі дэкаратыўна-прыкладнога мастацтва.

• На абслугоўванні ў аддзяленні сацыяльнай дапамогі дома знаходзіцца 514 непрацаздольных пажылых грамадзян, з іх 115 адзінокія, 390 адзінока пражываючыя, дзевяць грамадзян, якія пражываюць сумесна з працаздольнымі членамі сям’і. Абслугоўванне ажыццяўляюць 59 сацыяльных работнікаў, 20 з якіх ахопліваюць гараджан, 39 — сельскіх жыхароў.

• За дзевяць месяцаў бягучага года паслугі сядзелкі былі аказаны 21 грамадзяніну, дзённага догляду — пяці ветэранам працы, разавыя паслугі прадастаўляліся 81 чалавеку. Створана адна замяшчальная сям’я, дваім непрацаздольным грамадзянам арганізаваны доўгачасовы догляд.

• За восем месяцаў у шлюб уступіла шэсць мужчын ва ўзросце 60 гадоў і старэй. Нявестамі элегантнага ўзросту сталі тры жанчыны. Самаму даросламу маладому споўніўся 71 год, самай вопытнай маладой — 65.

• Пры Асіповіцкай раённай арганізацыі Беларускага Чырвонага Крыжа працуе валанцёрская група грамадзян пажылога ўзросту, якія аказваюць дапамогу тым, хто мае ў ёй патрэбу. Найбольш актыўныя валанцёры — Надзея Баранава, Ірына Гуцава, Валянціна Раманчук, Яўгенія Гунькіна, Марыя Шчэрбава, Ніна Гацко, Віктар Пятрунін.

• На ўліку ва ўпраўленні па працы, занятасці і сацыяльнай абароне райвыканкама знаходзіцца 12 967 чалавек, якія атрымліваюць пенсію, з іх 10 705 — пенсію па ўзросце (2 980 мужчын і 7 725 жанчын).

• Амаль кожны чацвёрты жыхар раёна — пенсіянер. Забеспячэнне дастойнага ўзроўню іх жыцця — адна з важнейшых задач мясцовых органаў улады і ўсёй сістэмы сацыяльнай абароны. У краіне ўстаноўлены ўзроставыя надбаўкі да пенсій, што прадугледжаны для асоб, якія дасягнулі 75 і 80 гадоў, і выплачваюцца як дабаўкі да пенсіі. Яны індэксуюцца і штогадова пераглядаюцца, а для асоб, якія дасягнулі 80 гадоў, дадаецца надбаўка на догляд.

Такім чынам, грамадзянам 75-79 гадоў выплачваецца ўзроставая надбаўка да пенсіі; 80 гадоў і старэй — узроставая надбаўка і надбаўка на догляд.

У верасні 75-79-гадовыя грамадзяне атрымлівалі дадаткова 91,45 руб., 80 гадоў і старэй — 121,93 руб.

Сярод пенсіянераў па ўзросце, якія знаходзяцца на ўліку ўпраўлення, 8 544 гараджаніны і 2 161 сельскі жыхар.

Сярэдні памер пенсіі па ўзросце за верасень па раёне склаў 943,80 руб.

На тэрыторыі Асіповіччыны чатыры жыхары атрымліваюць пенсію за асаблівыя заслугі.

• Самыя старэйшыя жыхары Асіповіччыны — Надзея Данілаўна Шчупляк (01.03.1923 г.н.), Ніна Трафімаўна Кавалёва (28.04.1924) і Ева Якаўлеўна Забродская (01.02.1925).

• У рамках рэалізацыі Нацыянальнай стратэгіі “Актыўнае даўгалецце-2030” у Бабруйску прайшло спартыўнае мерапрыемства “Здаровым жыць — здорава!”, арганізаванае цэнтрамі сацыяльнага абслугоўвання насельніцтва некалькіх раёнаў. Удзельнікі змаглі не толькі паспаборнічаць, але і абмяняцца гісторыямі жыцця, падзяліцца вопытам і мудрымі парадамі, устанавілі сяброўскія сувязі. Каманда асіпаўчан заняла трэцяе месца.