Раней доктар працаваў у Карытным, аднак пасля рэарганізацыі амбулаторыі яго перавялі ў Ясень. Першы час ён працягваў апякаць былых пацыентаў, і, нягледзячы на тое, што перадаў іх у надзейныя рукі Алены Дзятлавай, яны дагэтуль могуць звяртацца да яго па дапамогу. У яго на абслугоўванні знаходзіцца каля 700 чалавек, амаль 80 з іх дзеці. Работу ўрача агульнай практыкі Андрэй Дземідзенка сумяшчае з ультрагукавой дыягностыкай, якую праводзіць у раённай паліклініцы. Паспявае ён выязджаць і дадому да пацыентаў. А ўчастак яго немаленькі: адлегласць ад адной крайняй кропкі да другой — каля 50 км.

Спецыфіка работы ўрача на раёне — універсальнасць. У амбулаторыю звяртаюцца з рознымі праблемамі, і Андрэй Юр’евіч стараецца дапамагчы ўсім і максімальна ўважліва ставіцца да скаргаў.

— Канечне, ёсць пэўныя паталогіі, з якімі справіцца толькі вузкі спецыяліст, — расказвае Андрэй Дземідзенка. — З такімі ж хваробамі, як атыт, неўралгія, праблема з суставамі і гэтак далей змагаюся сама-стойна. Не хочацца лішні раз перанакіроўваць людзей у горад, бо хвораму далёка ехаць вельмі нязручна.

Сёлета ў нашай амбулаторыі зрабілі рамонт: замянілі вокны і агароджу, аднавілі фасад, устанавілі воданагравальнік. Працаваць стала больш камфортна, у памяшканні цёпла і ўтульна. І пацыенты заўважаюць змяненні.

Увогуле цікавасць работы ў сельскай мясцовасці для ўрача — у шматнакіраванасці. Асноўны кантынгент тут тэрапеўтычны, аднак за дзесяць гадоў урачэбнай практыкі Дземідзенка набыў дастаткова ведаў, каб аказаць першасную дапамогу ў розных выпадках — ад перавязкі ран да замены катэтараў. Жыхары Ясеня, Карытнага і навакольных вёсак вельмі паважаюць свайго доктара за высокі прафесіяналізм, увагу і індывідуальны падыход да кожнага.