Прафсаюзнае жыццё

Новы старт

У мінулую пятніцу адбылося пасяджэнне Асіповіцкага раённага аб’яднання прафсаюзаў з удзелам намеснікаў старшынь Магілёўскага абласнога прафсаюзнага аб’яднання Таццяны Марачковай і Асіповіцкага райвыканкама Ганны Землянухінай.

Галоўным на парадку дня стала абранне кіраўніка райаб’яднання, ім стаў Дзмітрый Кулік. Раней ён займаў пасаду галоўнага спецыяліста аддзела эканомікі ўпраўлення па сельскай гаспадарцы і харчаванні райвыканкама. Прадстаўляючы кандыдатуру Дзмітрыя Уладзіслававіча, Таццяна Марачкава адзначыла шэраг станоўчых якасцей новага лідара і выказала надзею, што добрыя традыцыі прафсаюзнага руху не толькі захаваюцца, але і будуць развівацца згодна з патрабаваннямі часу.

Знаёмцеся

Старшыня Асіповіцкага раённага аб’яднання прафсаюзаў Дзмітрый КУЛIК

Нарадзіўся 8 верасня 1987 года ў вёсцы Марахорава Жыткавіцкага раёна Гомельскай вобласці. Калі атрымаў сярэднюю адукацыю, паступіў у Белдзяржсельгасакадэмію на аграэкалагіч-ны факультэт. Пасля заканчэння ВНУ накіраваўся па размеркаванні ў СГК “Ляскавічы” ДПУ “Нацыянальны парк “Прыпяцкі”. Потым былі Петрыкаўскія аграхімічны аддзел і насенная інспекцыя. У апошняй працаваў дзяржінспектарам, намеснікам начальніка. Далей — пераезд у Асіповічы. Iнжынер па ахове навакольнага асяроддзя на ААТ “АЗАА”, затым першы намеснік старшыні райспажыўтаварыства. З 2015 па 2019 год — начальнік Асіповіцкай райінспекцыі прыродных рэсурсаў і аховы навакольнага асяроддзя. Апошняе месца працы — аддзел эканомікі ўпраўлення па сельскай гаспадарцы і харчаванні райвыканкама. 17 снежня Дзмітрый Уладзіслававіч узначаліў раённае аб’яднанне прафсаюзаў, якія ўваходзяць у Федэрацыю прафсаюзаў Беларусі.

Частая перамена пасад не перашкодзіла ўдасканаленню навыкаў і атрыманню новых ведаў. У 2010 годзе паступіў у Беларускі гандлёва-эканамічны ўніверсітэт спажыўкааперацыі. Праз год пасля заканчэння асноўнага курса навучання — магістратура, у 2015 годзе — ступень магістра эканомікі і кіравання.

Як кіраўнік будзе будаваць сваю дзейнасць?

— Кардынальна штосьці мяняць не планую, — кажа Дзмітрый Уладзіслававіч. — Работа аб’яднання ўжо аптымальна наладжана. Аднак з мэтай паскарэння і аптымізацыі дзейнасці будзем больш шырока выкарыстоўваць сучасныя тэхналогіі абмену інфармацыяй.