Па даных на ўчарашнюю раніцу, на Асіповіччыне ўбрана 2 439 гектараў збожжа і зернебабовых — 27% да плана. Намалочана 4 446 тон збожжа, сярэдняя ўраджайнасць 18,2 цэнтнера з гектара.

У ААТ “ВязаўніцаАгра” камбайны пабывалі на 41% плошчаў, якія належаць да ўборкі, намалочана 2 257 тон збожжа. Самая высокая ўраджайнасць — 21,6 ц/га — у ААТ “Ясеньскае”, а здабыткі тут складаюць 870 тон.

Датычна культур расклад наступны: аўса ўбрана 71%, ураджайнасць 22,5 ц/га, рапс упарадкаваны на 80%, аддача з кожнага гектара 14,1 цэнтнера. 72% — такія плошчы азімага ячменю ўжо абмалочаны, а яравога — 48%, сярэдняя ўраджайнасць апошняга  21,2 ц/га.

Паступова сельгаспрадпрыемствы прыступаюць да жытнёвых ніў. Гэтай культуры ўбрана 12%, яе ўраджайнасць 29,8 ц/га.

Пакуль адна гаспадарка — ААТ “Ясеньскае” — пачала ўборку зернебабовых культур. Выраслі яны добрыя: 34,9 ц/га.

Безумоўна, сёлетняе жніво праходзіць у складаных умовах. Хлебаробы прыкладаюць усе намаганні, каб своечасова і якасна ўбраць ураджай. Ёсць ужо і першыя лідары: вадзіцель Раман Іўчык з ААТ “ВязаўніцаАгра” з улікам рапсу перавёз 1 000 тон палявых дароў, а экіпаж у складзе старшага камбайнера Юрыя Еўдакімовіча і памочніка камбайнера Аляксандра Лапенчыка намалаціў больш за 500 тон зерня.