Становішча на палях сельгаспрадпрыемстваў змяняецца хутка: сама прырода падштурхоўвае хлебаробаў хутчэй выходзіць у поле. Актыўна праводзіцца комплекс вяснова-палявых работ: аграрыі падкормліваюць азімыя, узворваюць глебу, уносячы арганіку і мінеральныя ўдабрэнні. А галоўнае — поўным ходам ідзе сяўба яравых культур.

У гэты раз карэспандэнты раёнкі завіталі на поле ААТ “Авангард-Ніва”.

— Зараз сеем пшаніцу, — расказвае галоўны аграном гаспадаркі Уладзімір Цалуйка. — Пад яе адведзена 140 гектараў. Сваёй чаргі чакае ячмень. А зернебабовымі — аўсом і гарохам — запланаваныя 170 гектараў ужо засеяны. Надвор’е спрыяльнае: тыдзень-другі — скончым пасяўную.

Па словах галоўнага спецыяліста ўпраўлення па сельскай гаспадарцы

і харчаванні райвыканкама Аляксандра Кавалёва, усяго ў раёне запланавана засеяць 5 079 гектараў зерневымі і зернебабовымі культурамі. З іх 623 га зойме яравая пшаніца, 970 адведзена пад ячмень, 636 засеецца аўсом, а 160 — просам. На 2 000 гектараў будзе расці кукуруза на зерне. Яшчэ 690 га зоймуць зернебабовыя. Гэта традыцыйныя і асноўныя культуры для нашых гаспадарак. Па даных на ўчарашнюю раніцу, у раёне ўжо засеяна 1 630 га. Палявыя работы ў сельгаспрадпрыемствах працягваюцца ў набраным тэмпе.