У мностве прыбораў пульта ўпраўлення міні-ЦЭЦ начальнік змены Аляксандр Дзівакоў арыентуецца нібы рыба ў вадзе.

Гэта і зразумела: выпускнік Гомельскага дзяржаўнага тэхнічнага ўніверсітэта  атрымаў спецыяльнасць інжынера-энергетыка і ўжо дзесяць гадоў працуе на адным месцы.

На працягу змены ён вырашае мноства задач, якія датычаць работы з персаналам, забеспячэння тэхналагічнага працэсу, кантролю за параметрамі цепласецевага абсталявання, розных іншых вытворчых пытанняў.

Аляксандр Валер’евіч нясе адказнасць за ацяпленне горада і забеспячэнне яго гарачай вадой. Работа сур’ёзная, але тым і цікавая, лічыць спецыяліст. Мэта калектыву — забяспечыць бесперапыннае функцыянаванне станцыі, не дапускаючы аварыйных сітуацый. Калі намячаецца якісьці збой, адладжаныя прафесійныя дзеянні ўсяго персаналу дазваляюць стабілізаваць абстаноўку. Нездарма калектыў свой Аляксандр цэніць высока і адзначае, што цёплыя ўзаемаадносіны паміж работнікамі толькі спрыяюць зладжанасці. І не збіраецца шукаць працоўнае месца ў родным Бабруйску, таму што можа па-сапраўднаму рэалізавацца ў суседніх Асіповічах.