У гаспадарках Асіповіцкага раёна набіраюць тэмпы палявыя работы
У гаспадарках Асіповіцкага раёна набіраюць тэмпы палявыя работы
Кожны раз яравая сяўба мае свае адметнасці. Сёлетняя запомніцца хлебаробам доўгім чаканнем спрыяльнага надвор’я і штодзённым маніторынгам стану палёў на прадмет утрымання вільгаці.
І вось толькі ў апошнія дні палеткі пачалі падсыхаць, даючы магчымасць працаваць тэхніцы.
— Заўсёды трымаем трос напагатове, — падзяліўся галоўны аграном дзяржаўнага прадпрыемства “Вязаўніца-Агра” Панцялей Качанжы. — І час ад часу даводзіцца дапамагаць таму ці іншаму трактару. Аднак прамаруджваць з тэрмінамі нельга: важны кожны красавіцкі дзень.
Нягледзячы на складанасці, гаспадаркай засеяна ўжо 104 гектары зернебабовымі культурамі і 56 — аднагадовымі травамі. На палявых работах задзейнічана пяць энерганасычаных трактароў “Беларус” 3522 і 3022, а таксама столькі ж больш лёгкіх. Плюс прычапныя агрэгаты: дыскатары, культыватары, сеялкі. Усяго ж трэба будзе пасеяць 790 га яравых зерневых, 2 000 га кукурузы на сілас, 1 000 га — аднагадовых траў. Аб’ёмы значныя. Аднак гэта толькі надае запалу аграрыям. Людзей хапае, тэхнікі таксама, ды і працаваць, шчыра кажучы, хочацца: палеткі проста цягнуць. Папярэднія работы па ўнясенні комплексных удабрэнняў выкананы, прыйшоў час рытмічнай эфектыўнай працы. Самай мірнай і стваральнай.
