Згуртаваныя не толькі будзённымі справамі

У Чавускім раёне прайшоў ІІІ абласны турыстычны злёт актыву Магілёўскай абласной арганізацыі РГА “Белая Русь”, прысвечаны Году міра і стварэння.

У нефармальнай абстаноўцы сабралася 21 каманда з розных рэгіёнаў Прыдняпроўскага краю, так што аднадумцы маглі правесці час цікава, разнастайна і з карысцю. Уражаннямі аб мерапрыемстве дзеліцца старшыня раённага аб’яднання РГА “Белая Русь” Ірына Сяргейчык:

— Канечне, спартыўная частка злёту выклікала найбольшы азарт і мноства эмоцый, таму што спалучала сур’ёзныя і досыць складаныя элементы з жартаў-лівымі — штурханне бервяна, кіданне кольцаў, дартс, конкурс па запуску папяровых самалётаў, корнхол і спартыўная рыбалка, пераадоленне турыстычнай паласы перашкод і кіданне валёнка. Дарэчы, у двух апошніх конкурсах зборная Асіповіччыны стала пераможцам.

Нікога не пакінуў абыякавым конкурс патрыятычнай песні ля вогнішча.

Знайшлося месца і для сур’ёзнай работы. Актывісты “Белай Русі” з вялікай зацікаўленасцю ўдзельнічалі ў пасяджэнні круглага стала “Развіццё грамадзянскай супольнасці ў Рэспубліцы Беларусь і арганізацыя ўзаемадзеяння канструктыўных грамадскіх аб’яднанняў і палітычных сіл”, на якім абмяняліся меркаваннямі з дэпутатам Палаты прадстаўнікоў Нацыянальнага сходу Рэспублікі Беларусь Святланай Шутавай і намеснікам старшыні РГА “Белая Русь” Андрэем Басаком. Плённа прайшоў і семінар-практыкум “Школа маладога лідара Белай Русі”.

Канечне, галоўны вынік такіх нефармальных сустрэч не ў поспехах, занатаваных у турнірных табліцах. Людзі, якія маюць актыўную жыццёвую пазіцыю і аб’яднаны агульным пачуццём патрыятызму, сустрэліся з аднадумцамі і адчулі, што разам яны стваральная сіла! І гэтае пачуццё дае магутны імпульс для ўдзелу ў справах, якія вынікаюць з асноўнай мэты нашай агранізацыі: кансалідацыя грамадскасці і ўсіх канструктыўных сіл, арыентаваных на супрацоўніцтва з уладай і яе падтрымку на ўсіх узроўнях для дасягнення высокай якасці жыцця ў стваральнай працы.