У Асіповіцкім раёне працягваюцца дарожныя работы
14 апреля 2023 10:08
У Асіповіцкім раёне працягваюцца дарожныя работы
ДЭУ № 73 ачышчае праезную частку на трасе М5 “Мінск-Гомель”, убірае пясок уздоўж мастоў, а ў Цяплухах ідзе афарбоўка падземнага пешаходнага пераходу. Зараз вядзецца ямачны рамонт метадам прапіткі на ўчастку дарогі Р91 Асіповічы-Баранавічы, які адпавядае гарадской вуліцы Юбілейнай. Там задзейнічаны два трактары і аўтамабіль “ГАЗель”.
Акрамя сваіх запланаваных работ, дапамагаюць калегам добраўпарадкаваць горад. На вуліцы 60 гадоў Кастрычніка працуе ўстаноўка STRASSMAYR, з дапамогай якой праводзіцца ямачны рамонт струйна-ін’екцыйным метадам. Рамонт з дапамогай гэтага абсталявання зараз лічыцца адной з самых зручных і бяспечных тэхналогій. Адна ўстаноўка замяняе цэлую брыгаду, але, на жаль, яна пакуль адзіная на два суседнія раёны.
