Працаваць інжынерам па рамонце абсталявання, будынкаў і збудаванняў не толькі вельмі адказна, але і цікава, упэўнены Віталій Васько. Ён прыйшоў у Асіповіцкі доследны лясгас амаль чатыры гады таму і адразу далучыўся да рэалізацыі маштабнага праекта — будаўніцтва пялетнага завода ў Замошшы.

— Гэта быў вельмі сур’ёзны вопыт для мяне, пасля якога, напэўна, усё ні па чым, — дзеліцца Віталій Анатольевіч. — Суправаджаць будаўніцтва, так кажучы, ад “а” да “я”, мадэрнізацыю ці рэканструкцыю, падтрымліваць тэхнічны стан — справа нялёгкая, але захапляльная. Асабліва ўлічваючы тое, што на балансе лясгаса знаходзіцца каля 400 пабудоў рознага прызначэння. За тры с паловай гады пад маім наглядам было пабудавана і адрамантавана шмат збудаванняў — ад прамысловага склада на тэрыторыі для захавання і пілавання лесапрадукцыі, пляцоўкі дарошчвання пасадачнага матэрыялу ў гадавальніку да цяпліц, майстэрняў і бытавых карпусоў. Адметна, што ўсе яны маюць рознае прызначэнне і спецыфіку. Таму каб выявіць адпаведнасць усіх праводзімых работ праектна-каштарыснай дакументацыі на кожным этапе будаўніцтва ці рамонту, трэба было скрупулёзна ўнікаць ва ўсе нюансы, звяртаць увагу на кожную дэталь. Акрамя таго, пастаянна маю зносіны з кіраўніцтвам розных службаў, падрадчыкамі, рабочымі і гэтак далей. Шчыра кажучы, вельмі цікава прасочваць будаўніцтва з нуля і потым бачыць, што ж атрымалася, быць датычным да стварэння новага.

Дзякуючы Мікалаю Раўбелю былі пабудаваны і мадэрнізаваны прыгожыя будынкі лясгасаў ва ўсім раёне. Прыемна даглядаць за іх тэхнічным станам, да таго ж гэта добры стымул добраўпарадкаваць нашу тэрыторыю і далей.

Віталій Васько спрабаваў сілы ў дызайне, калі ў Магілёве прыняў удзел у адкрытым конкурсе на лепшы арт-аб’ект для добраўпарадкавання лясгасаў. Яго эксклюзіўныя дубовыя арэлі адзначаны Дыпломам II ступені і зараз упрыгожваюць Магілёўскі заасад. Гонар лясгаса ён абараняў і на раённай спартакіядзе па лёгкай атлетыцы.