Боль, які не сціхне

У раённай бібліятэцы адбылася духоўна-патрыятычная сустрэча

з іерэем храма іконы Божай Маці “Усіх смуткуючых Радасць” Раманам Васько “Наказ жывым нясе Хатынь”. Святар разам з навучэнцамі Асіповіцкага дзяржаўнага каледжа паразважаў пра дабро і зло, важнасць захавання гістарычнай памяці.

— Пашана да мінулага — гэта вялікая каштоўнасць і сапраўдны нацыянальны здабытак, — лічыць айцец Раман. — Таму мы павінны захаваць яе і перадаць моладзі, накіраваць на супрацьстаянне спробам перапісаць гісторыю. Асабліва гэта тычыцца страшнага лёсу, які напаткаў тысячы населеных пунктаў Беларусі і іх жыхароў. Як адзначыў у адной са сваіх прамоў мітрапаліт Веніямін, Хатынь — красамоўны доказ мужнасці беларускага народа. Наш прамы абавязак памятаць той страшны момант у гісторыі, дзякаваць Богу за тое, што цяпер Радзіма не перажывае такога болю. Ад кожнага чалавека паасобку залежаць мір і любоў у краіне. Калі мы будзем любіць Беларусь, годна служыць ёй, — менавіта служыць, а не працаваць, бо праца мае на ўвазе выгаду, а служба — больш узвышаны сэнс, — тады тая каштоўнасць, якая перадалася з крывёю продкаў, будзе памнажацца ў нашых сэрцах.

Памочнік пракурора Асіповіцкага раёна Васіль Евілін:

— На сёння ў ходзе расследавання крымінальнай справы, узбуджанай па факце генацыду беларускага народа падчас нямецка-фашысцкай акупацыі, устаноўлена, што цалкам ці часткова на тэрыторыі Асіповіцкага раёна было спалена 88 населеных пунктаў. У спіс “вогненных вёсак” унесена Сёмкіна Слабодка, спаленне якой было пацверджана паказаннямі сведкаў. Як мінімум сем знішчаных карнікамі паселішчаў пасля вайны не адрадзіліся.