Ідэальнага мужчыну вызначыць лёгка: слоўнікавы запас такога пераважна ўключае выразы: “Ты прыгожая”, “Давай купім”, “Лепш адпачні”, “Я ўсё вырашу”. Па крайняй меры, так сцвярджаецца ў анекдоце, а анекдот, як вядома, маленькае адлюстраванне вялікага жыцця. А вось якая яна, ідэальная жанчына? Напярэдадні 8 Сакавіка вырашылі стварыць яе партрэт разам з прадстаўнікамі моцнага полу. Вось што атрымалася.

— Ідэальных жанчын не бывае. Ды такія, мабыць, і не патрэбны: тады ж самому трэба адпавядаць ідэалу. Ну а жанчына, з якой хочацца быць заўсёды побач, — добрая, спагадлівая, сапраўдная гаспадыня дома. Карыстаючыся выпадкам, віншую сваю жонку Таццяну і жадаю ёй здароўя, усім астатнім я яе забяспечу сам. Найлепшыя пажаданні і жанчынам-калегам — такіх сярод таксістаў зараз нямала, а таксама кліенткам. Рыхтуемся працаваць у святочны дзень ва ўзмоцненым рэжыме!

— Знешнасць у такім “партрэце” адназначна не прыярытэт. Тут важны ўнутраны свет. Чым ён багацейшы, тым больш прывабная жанчына. Дабрыня — абавязковая якасць. Зараз такое жыццё, што ўсе кудысьці бягуць, спяшаюцца, забываючы, прынамсі, пры гэтым проста жыць. Ідэальная дзяўчына ўмее кіраваць сваім часам, з разуменнем успрымае моцныя і слабыя бакі мужчыны. І заўсёды будзе яму падтрымкай. Пры гэтым няважна, дзе яна знаходзіцца: на далёкай Алясцы ці ў Асіповічах.

— Добрая, не сквапная, глядзіць на акаляючы свет у пазітыўным ракурсе, заўсёды гатовая да перамен, да чагосьці новага ў сваім жыцці. Асобны пункт — уменне даглядаць за сабою, сачыць за модай і яе тэндэнцыямі.

— Працалюбівая, каб любіла дзяцей і мужа. Мы з жонкай Любай пажаніліся, калі мне было 19, а ёй 20. У маі ўжо будзе 49 гадоў, як разам. Многія лічаць, што калі шлюб ранні, то наўрад ці з яго будзе плён. Я ж хачу сказаць: калі чалавек твой, то няважна, у якім узросце пажаніліся. Галоўнае — адносіны адзін да аднаго. Свая жонка і павінна быць ідэалам. Перш за ўсё, адносіцца да яе трэба так, тады і пытанняў не павінна ўзнікаць.

— Добрая, верная, клапатлівая — гэтых якасцей дастаткова. Ідэальных жанчын, як і мужчын, у прыродзе, мабыць, не існуе. Але нічога нам не замінае думаць, што такія ёсць.

— Ідэальная жанчына — гэта, перш за ўсё, мама нашых дзяцей. Вось за гэтую якасць мужчына ў першую чаргу і павінен цаніць жанчыну. І я рады, што ў мяне ёсць дзеці — шасцігадовы Багдан і чатырохгадовая Ксюша.

Хто ўважліва чытаў, зрабіў адзнаку, што галоўнай якасцю ідэальнай жанчыны землякі лічаць ДАБРЫНЮ. Астатняе — па індывідуальным гусце. Важна і тое, што мужчыны ўсё ж дазваляюць нам, жанчынам, быць крыху неідэальнымі. Аднак імкненне стаць лепшай версіяй сябе толькі вітаецца!